深井香港新界大陸西南岸。西面係青龍頭,東面係汀九。南面對正馬灣海峽,望住青馬大橋。深井屬於荃灣區,響一個河谷下面。

深井村

深井原本只係條村,由河口沿住河谷發展。後尾呢度有青山公路經過,有一啲工廠就搬來呢處,最出名嗰幾間有九龍紗廠、嘉頓麵包、生力啤酒等。之後有啲轉咗做住宅大廈,家下得返嘉頓麵包。

為咗發展屯門新市鎮,香港政府起咗條屯門公路連埋屯門荃灣。而條路就響正深井村嘅頭頂。

深井最出名係燒鵝,不過其實都有超過15間唔同種類嘅食肆,提供中、西、意同埋印度等等嘅菜式,所以深井有美食中心嘅稱號。

深井有獨特嘅海灣,可以遠眺青馬大橋同埋馬灣,好天嗰時重可以望到香港國際機場。喺1980至1990年代,多間地產發展商都喺深井發展,而家沿海地區已經起咗多個私人屋苑,例如碧堤半島同埋浪翠園等大型屋苑,都係以海景同寧靜做賣點,但社區設施相對屯門同埋荃灣明顯就較為麻麻地,因為呢度冇鐵路到,所以對外公共交通需要依賴往來屯門同埋荃灣嘅巴士小巴。