煠（又寫做熠、烚，粵拼：saap6），又叫焯（又寫做灼，粵拼：coek3），或者叫淥（又寫做熝，粵拼：luk6），係一種煮食技巧，將生料嘢食放入滾水，叫做煠。生料食材例如蝦、肥牛、生菜咁。煠熟嘢食可以保持原汁原味，尤其係新鮮、爽、嫩、滑材料，又健康。
煠可以用清水「白煠」，或者加料似打甂爐。又可以白煠之前，食料加工腌製，比如加啤酒、糖、白酒咁，好似鵝腸、豬腰比較會先腌後煠。
