無綫新聞對香港非建制派嘅唔公平對待

無綫新聞一般被視為親中派媒體,報導嘅觀點偏向北京或香港政府官方嘅聲音。喺處理一啲同香港非建制派有關嘅新聞時,無綫新聞有時會被部分嘅人批評,唔公平咁對待非建制派,反而會畀親中派充足嘅時間解釋佢哋嘅觀點。加上部分無綫新聞嘅高層同親中派嘅關係,喺社會上有一定爭議。喺呢啲問題上,有時無綫新聞都會回應否認。

事件

2015年港大法律學院前院長陳文敏競選副校事件

2015年,香港大學法律學院前院長陳文敏競選副校嗰陣,引起咗坊間一啲討論。而陳文敏本身同民主派關係唔錯,之前又曾經批評全國人大作「行政決定」侵蝕香港嘅司法權同埋高度自治[1],一啲親中派媒體亦一直對陳文敏攻擊。之後,時任行政長官梁振英就被報道干預學術自主,介入事件,遊說校委會成員唔好委任陳文敏。但係無綫新聞除咗梁振英嘅公開回應之外,其他相關新聞無綫一律無報導[2]

2015年錯誤報導民主、公民黨反對大嶼山新路

喺2015年10月,汲水門大橋因為有船撞橋而封閉,搞到大嶼山有兩個鐘變咗孤島,無綫新聞之後報導重提2002年連接大嶼山元朗嘅十號幹線方案,錯誤報導民主黨公民黨反對方案。但當時公民黨未成立,民主黨議員投票贊成,反而係民建聯自由黨聯手否決。通訊局裁定投訴成立,向無綫同無綫網絡電視出警告。不過,無綫新聞只係低調更正報道,無正式更正聲明或者道歉[3]

2016年香港立法會選舉

選舉投票日之前,有好幾個民主派候選人宣布退選,希望佢哋嘅支持者集中票源畀其他民主派嘅候選人。不過,無綫新聞就被指為咗幫助親中派選情,特登唔報導呢單新聞[4]

七二一元朗襲擊

喺七二一元朗襲擊入面,有人比較咗ViuTV香港開電視香港電台同埋無綫新聞三者新聞嘅處理手法,提到另外三間媒體都係用順敘式嘅方式報道事件,但係偏偏無線新聞就用倒敘方式呈現事件,加上若干剪接技巧,嘗試傳遞黑衣人(反送中示威人士)「先撩者賤自作自受」嘅訊息[5]

無綫新聞同親中派嘅關係

無綫新聞同親中派亦被指友好,令一啲人對無綫新聞有所批評[4]。有啲激進親共派組織,甚至公開稱讚無綫新聞。

曾經喺2015年招攬民建聯前總幹事陸漢德擔任新聞部編輯主任(Managing Editor) 一職,​主力負責本地政治新聞嘅審稿工作。事件引起好多人擔心會唔會有進一步嘅政治審查,但無綫當時就否認事件[2][6][7]。不過,有現職員工喺接受《立場新聞》訪問嘅時候就話,打死都唔信上層請人冇政治考慮[8]。前無綫新聞部主播柳俊江就話,無綫咁做,佢哋嘅政治新聞直程唔使睇,又話佢並唔係普通有政治背景嘅人,而係曾經統籌民建聯選舉工程嘅人,根本唔應該請佢[9]

另外,喺2016年2月立法會新界東補選,無綫新聞亦得到民建聯嘅協助。雖然選舉管理委員會設立咗實時點票嘅結果,但無綫就反而用民建聯嘅點票數據,引來質疑。當時無綫就話民建聯嘅數據快啲,但呢個說法就亦唔係個個都接納[10]

2019年7月16號,激進親共派組織珍惜群組香港記者協會會址請願,聲稱記協濫權同立場偏頗,與此同時,召集人李璧而又點名又讚揚無綫新聞「走位好」[11]

參考

  1. "【專訪】陳文敏嘆人大「行政決定」續侵蝕港司法權高度自治 | 即時新聞 | 要聞 | 20180520". web.archive.org. 2018-06-17. 喺2021-06-23搵到.
  2. 2.0 2.1 "民建聯總幹事加盟無綫新聞部 | 立場報道 | 立場新聞". 立場新聞 Stand News. 喺2021-06-23搵到.
  3. "誤報民主、公民黨反對大嶼山新路 通訊局警告無綫 | 立場報道 | 立場新聞". 立場新聞 Stand News. 喺2021-06-23搵到.
  4. 4.0 4.1 Au, Cheuk Hang; Ho, Kevin K. W.; Chiu, Dickson K.W. (2021-04-19). "The Role of Online Misinformation and Fake News in Ideological Polarization: Barriers, Catalysts, and Implications". Information Systems Frontiers (英文). doi:10.1007/s10796-021-10133-9. ISSN 1572-9419.
  5. "先撩者賤、自作自受? ─ 對 TVB 報道 7.21 元朗白衣人襲擊事件手法的觀察 | 讀者投稿 | 立場新聞". 立場新聞 Stand News. 喺2021-06-23搵到.
  6. BeeMedia; AM730. "[am獨家]民建聯總幹事空降無綫新聞部". AM730 香港免費派發的報紙 (Online Edition of am730). 喺2021-06-23搵到.
  7. 周雪君 (2015-03-02). "TVB新聞部聘民建聯前總幹事 專責政治新聞". The News Lens 關鍵評論網 (中文). 喺2021-06-23搵到.
  8. "無綫新聞部現職員工:請人冇政治考慮 打死都唔信 | 立場報道 | 立場新聞". 立場新聞 Stand News. 喺2021-06-23搵到.
  9. "TVB聘民建聯總幹事任新聞編輯主任 柳俊江:依間政治新聞直程唔洗睇啦". life.memehk.com (英文). 喺2021-06-23搵到.
  10. "【新東補選】用民建聯數據惹質疑 無綫:快過選舉事務處公布 (07:56) - 20160229 - 港聞". 明報新聞網 - 即時新聞 instant news (中文). 喺2021-06-23搵到.
  11. "珍惜群組不滿記協譴責警察 斥黑記者、黑傳媒 | 獨媒報導". 香港獨立媒體網. 原著喺2020-01-12歸檔. 喺2020-01-12搵到.