爛尾樓

爛尾樓（英文：unfinished building）或者叫做爛尾建築、爛尾工程，係指工程未開始，只係喺設計階段就「爛尾」，或者係開始咗之後，喺某個階段，因為種種原因而被放棄或擱置，而未能完工嘅「爛尾」建築物。呢啲建築物可以係樓、橋、路、隧道、塔，亦可而係填海工程、機場、港口之類。

聯合大樓（Unity Tower，原名 Szkieletor、NOT Tower）由1981年開工，經過幾次轉手、改名，到咗2020年先至完工。

中國

爛尾工程最多嘅地方係中國大陸，而喺中國，最多爛尾嘅係樓，估計中國有二千萬個爛尾樓單位，所以喺中國出現咗「拒繳房貸」嘅現象，令到經濟陷入惡性循環。

喺中國，爛尾建築通常係因為開發商唔夠錢繼續起落去，最典型嘅例子係恆大集團債務危機，喺2021年《紐約時報》話恆大集團欠供應商、債權人同埋投資者總共1.9665萬億元人民幣。兩年之後，根據香港交易所既公佈，截至2023年6月30號，恆大嘅負債總額增加2.3882萬億元人民幣（折合三千三百億美金；二千七百億英鎊；三千億歐元），比《紐約時報》之前講嘅多20％，而債務總額相當於中國國內生產總值（GDP）嘅2%。呢份中期年報亦顯示，恆大嘅總資產係1.743997萬億元人民幣，恆大已經資不抵債，所以基本上佢哋手上嘅工程好難唔爛尾。

半爛尾工程

中國天津市西青區嘅高銀金融117，又叫做天津高銀117大廈，係高銀地產集團投資，中國建築第三工程局負責起嘅摩天大廈，樓高597米，2008年開工，原本諗住喺2017年起好，但係喺2015年9月8日封頂之後就停工，係依家世界上第二高嘅爛尾建築。

沙地阿拉伯既吉達大廈（Jeddah Tower）喺2013年開始起既摩天大廈，但係喺2018年停咗工，2023年再次開工。佢有170層，至少高1000米，落成嗰時會係世界上最高嘅摩天大廈。

喺1992年就停工，2008年復工既平壤（Pyongyang）柳京飯店（Ryugyong Hotel）有105層、高330米，係世界上最高嘅爛尾酒店，停工嗰時係全世界最高嘅爛尾樓。

有啲爛尾工程未必係爛晒尾，呢啲工程只係俾建築公司推遲，或者施工進度極其緩慢。最著名嘅呢類「爛尾工程」係安東尼高第（Antoni Gaudí）喺巴薩隆拿（西班牙文：Barcelona）嘅聖家大教堂（西班牙文：Sagrada Família，天主教叫聖家大殿）。呢座教堂喺1882年開始起，到依家都未完成，不過當局計劃喺2026年高第逝世一百週年之前完工。