王應睞

王應睞（Wang Ying-lai；1907年11月13號—2001年5月5號）係中國生物化學家。佢奠立咗中國嘅生物化學 ，亦係第一個科學家整到人工胰島素 。

生平

王應睞來自個華僑家族。1907年，佢響福建金門山後社度出世。王幼年坎坷，兩歲死老頭，六歲死老母。呢種遭遇，令佢更加堅強同勤力。不過佢聰穎過人，四歲入公立私塾讀書。11歲跟二哥三哥讀鼓浪嶼名校英華書院，6年半讀晒9年書。1925年，17歲就入福建協和大學（Fukien Union College）讀化學，1926年，轉到南京金陵大學化學系，專攻工業化學。佢1929年畢業，重得到金鑰匙獎。佢繼續響大學做嘢，1931年多嘢做到肺癆。

求學研究

佢去北平養病，1933年入咗燕京大學做研究生。佢因為呢個傳染病，決定改讀生物化學，以助窮人醫病。佢響裏便研究哥羅方、甲苯同蛋白酶之間嘅作用，重有豆漿年奶嘅消化率。1934年佢又病過，又要休養。1936年，佢病好就返金陵大學做講師，主攻農村營養。1937年，日本攻入中國，佢返去鼓浪嶼。同年，王應睞考到庚子賠款獎學金到劍橋大學，同行重有魯桂珍同沈詩章。佢博士班度跟L. J. Harris研究維化命，發明硫色素熒光測定法，可以用簡單方法，準確測維他命B1含量。連帶研究到其他維他命B，同埋維他命C嘅測定法，1941年因為成就卓越，免試得生物化學博士。之後，佢繼續留響劍橋，入Dunn實驗室，同T. Moore研究出維他命A過多中毒嘅原因。之後，1943年同David Keilin研究血紅素。1945年，佢決定返中國，Keilin都留佢唔住。

中國

返中國之後，做過南京中央大學醫學院生物化學教授、中央研究院上海醫學研究所高級研究員。1949年，中國共產黨成立中國人民共和國之後，佢做過中國科學院上海生理生化所副所長、生化所所長。佢即極搵留學生返中國做生物化學研究，好似同佢合稱劍橋三劍俠嘅曹天欽同鄒承魯，都來到生化所。1955年，佢就做咗中國科學院院士。1958年，中共派佢去搞中國科學院上海分院，重做埋院長。佢一直有搞生物化學班，1961年，就育出四百人。1965年9月，佢帶佢班科學家，做到世界上第一隻合成牛胰島素。

1966年到1976年，文化大革命期間，生化所畀人批鬥，畀人話係小劍橋。所內有人離開，有人自盡，人材零落。王應睞幸存落來，不過研究就停頓咗。文革之後秩序恢復，佢繼續搞班。1981年，佢又帶住班科學家合成到世界第一隻人工嘅轉移核醣核酸。

佢2001年5月5號瞓覺嗰陣，夜晚7點10分 病死響上海嘅華東醫院，死時93歲。

成就

王應睞將生物化學研究引入中國，唔再係邊緣學科。佢同T.Moore發現咗點解過量維他命A會中毒。無耐，又證到豆科植物根瘤，係有血紅蛋白。佢又研究過寄生馬胃嘅馬蠅，蠅有特殊血紅蛋白，唔同生活條件，血紅蛋白有唔同性質同功能。佢主要研究酶化學同營養代謝，尤其響維他命、血紅蛋白、琥珀酸脫氫酶有成績。佢發現琥珀脫氫酶嘅酶朊同FAD以共價鍵結合，又可以受磷酸鹽等物刺激。

1965年佢成功人工合成胰島素，同埋1981年做到酵母丙氨酸、轉移核糖核酸。