玫瑰

玫瑰（粵拼：mui4 gwai3；學名：Rosa）；第個名係刺玫瑰（ci3 mui4 gwai3）；喺伊朗當地係嗌藏紅花（zong6 hung4 faa1；波斯文：رز‎roz）；佢係薔薇科嘅落葉灌木，而家喺全球唔少嘅國家都可以搵到。玫瑰重係淨化環境嘅植物，佢屬下有超過100個品種。

How to read a taxobox

玫瑰

紫色嘅玫瑰

物種分類

界	植物界 Plantae
門	被子植物門 Magnoliophyta
綱	雙子葉植物綱 Magnoliopsida
（未分級）	I類真薔薇分支 eurosids I
目	薔薇目 Rosales
科	薔薇科 Rosaceae
亞科	薔薇亞科 Rosoideae
屬	薔薇屬 Rosa L.

品種

超過100種^[1]

形態

呢樖嘢嘅樹葉係羽狀複葉，而且樹葉嘅背面係生嗮毛；而佢啲莖好幼，重生咗好多密密麻麻嘅刺響度。而佢嘅花凈係生喺枝頂，而花色有紅、黃、白、藍、紫、粉紅、橙等色，而且會散發清香。

用途

玫瑰有好高嘅經濟價值，佢可以用嚟提取香精同玫瑰油。而喺市面上賣嘅玫瑰油就好貴，貴過黃金成1——6倍^[2]。佢一般用喺化妝品、日用化學品、食品加工同醫藥衛生等工業範圍。

淨化環境

玫瑰有好犀利嘅阻擋灰塵能力，尤其係對CO₂、HF同埋SO₂等有毒氣體都有好勁抽嘅吸收能力。

文化

花界嘅皇后

英國人同美國人成日習慣用顏色比較靚，而且又香嘅玫瑰話成係「友誼之花」同「愛情之花」。喺英國同美國街頭，佢哋成日將玫瑰花當成係最有米嘅禮物嚟送畀人。而情人佢哋之間送玫瑰，就係用嚟話清楚「佢哋嘅愛」噉解。所以佢哋兩個國家嘅人成日將玫瑰花當成係「花界嘅皇后」。

國花

將玫瑰定為國花嘅國家，有歐洲嘅盧森堡同保加利亞、中亞嘅伊朗、伊拉克同敘利亞^[3]。

英國嘅國花

喺公元14世紀——15世紀到，英國發生咗場玫瑰戰爭。因為佢哋打仗嗰兩個家族，用玫瑰嚟當成佢哋家族嘅符（一個係紅玫瑰，另一個係白玫瑰）。後嚟呢兩個家族達成咗共識，就合併成一個家族嚟主持王位，就用咗紅玫瑰嚟做符，結果紅玫瑰就一直做咗英格蘭王室嘅符。而英國嘅國花就係從佢哋王室用嘅圖符而嚟^[3]。

美國嘅國花

其實美國嘅國花係乜，一直拗咗成百幾年咁耐，直到1986年9月23號，嗰時由參議院嘅議員——莊登尼喺國會入面提議重經過民眾嘅調查，跟住由眾議院通過表決而通過咗，將玫瑰定咗係美國嘅國花。而玫瑰喺佢哋嚟講就係愛情、和平、友誼、勇氣同獻身精神嘅化身噉解^[3]。實際喺美國嘅部分州份喺嗰日之前已經將玫瑰花定為州花。

伊朗三寶

喺伊朗，當地啲人成日將玫瑰同石油、地氈話成係「伊朗三寶」。

中國部分城市嘅市花

蘭州市花

喺蘭州，佢哋最出名種嘅係苦水玫瑰。喺道光23年（1843年），玫瑰花就由嗰時王乃賢從西安嗰度帶返嚟蘭州，之後傳咗嚟苦水（而家嘅甘肅省蘭州市永登縣苦水鎮）嗰邊，後嚟俾當地啲後人話佢係苦水玫瑰，而「苦水玫瑰」嘅名就係噉嚟^[4]。而苦水玫瑰喺蘭州當地係出嗮名嘅，後嚟喺1984年2月25號嘅蘭州市第九屆人大第十次會議入面，將玫瑰花定為蘭州市花^[5]。

瀋陽市花

喺瀋陽，尤其係遼中縣嗰邊，當地嘅遼中玫瑰係出嗮名嘅。因為佢係遼中玫瑰嘅原產地，唔單止有好長嘅歷史、甚至有好多個品種兼有優質、高產、抗性強、花型而花色比較靚，花香重好香、花期長同適應性比較大。經過幾代嘅民眾猛咁傳，市場同消費者都話當地嘅玫瑰出咗名，「遼中玫瑰」嘅名就係噉嚟^[6]。

喺1985年4月2號嘅瀋陽市第九屆人大第十四次會議入面，通過將玫瑰花定為瀋陽市花^[5]。遼中玫瑰喺2012年攞到中華人民共和國國家質檢總局頒發嘅「國家地理標誌保護產品」稱號^[6]。

烏魯木齊市花

喺1980年代前後，中華人民共和國各地都按本土特色嚟揀咗啱嗮佢本土地區嘅花嚟做市花，而烏魯木齊就揀咗玫瑰花嚟做市花。係因為烏魯木齊嗰時周街都係種咗玫瑰，但係入咗2010年代之後，由於烏魯木齊市變咗好多，主城區入面已經好難見到玫瑰花，搞到政協委員話要重新揀過市花^[7]，不過一直都冇下文。

銀川市花

銀川曾經喺1982年定咗夾竹桃係市花，但係1984年9月12號嘅第八屆人大常委會第三次會議將夾竹桃嘅市花頭銜取消，俾玫瑰取代^[8]。

佳木斯市花（已經取消咗）

之前佳木斯市花一直係野玫瑰，但係喺2010年嘅佳木斯市第十四屆人大常委會第十次會議嘅《改市樹市花嘅決定（草案）》入面，將市樹同市花統一做杏花^[9]。

花語

花語呢家嘢起源於法國1819年作家夏洛特．德．拉圖女士（Madame Charlotte de Latour）嘅一本書《花語》（Le Langage des fleurs），講明每種花或綜合花束嘅意義。俾當時上流社會女性得閒嗰時睇。而玫瑰就係最多人關注^[10]。

按顏色分嘅話，唔同色嘅玫瑰嘅花語分別如下^[11]^[12]^[13]：

紅玫瑰：代表愛、熱情、「熱愛你」、求愛、「我愛你」、熱戀。一般俾人認為係最啱送畀老婆或者感情深厚嘅女朋友，但啱啱識嘅女仔，就唔係咁適合。
黃玫瑰：又叫友情玫瑰，代表純潔嘅友情同美好嘅祝福。一般俾人認為可以送畀朋友，但唔適合送畀拍緊拖嘅女朋友，因為佢都有代表嫉妒、失戀同消逝嘅愛，好多時係分手嘅代表禮物。
深粉色玫瑰：代表幸福同感激，象徵著感恩、優雅同歡樂，一般俾人認為無論送畀朋友，或者情人，定老婆，都適合。
粉色玫瑰：代表初戀、求愛、銘記於心、愛心同特別嘅關懷，愛嘅宣言。一般認為，粉色玫瑰係所有女性色調當中最通用嘅，適合各種場合，而且佢可以表達感激之情，亦都係送畀正喺度悲傷嘅人嘅絕佳選擇，仲係表示祝賀或承認初戀嘅好方法。
淺粉色玫瑰：代表仰慕，優雅、快樂同溫柔。一般俾人認為顏色好柔美，適合用嚟表白，同時都係送畀阿媽、家姐甚至閨蜜嘅禮物。
白色玫瑰：代表童貞、天真、純潔、尊敬、謙卑、美麗。喺外國，呢種花亦係新娘花，外國人係婚禮經常用嘅花。但一般俾人認為喺香港婚禮同開張就唔多適合。
橙色玫瑰：代表羞怯、「獻畀你一份神秘嘅愛」，係慾望同熱情嘅象徵。一般俾人認為適合送畀女朋友，祝賀，友誼，感謝等等。亦都適合升職同畢業嗰時送花。
香檳玫瑰：代表「我只鍾意你一個」，一般俾人認為係純潔、專一嘅愛情。
綠玫瑰：代表純真、希望、青春常駐，係生命嘅顏色。好多人認為綠玫瑰係染咗色而色嘅，但事實並唔係噉。綠玫瑰係1743 年左右開始自然開花。除咗單玫瑰或野玫瑰之外，佢有可能係最古老嘅玫瑰品種。但事情係噉樣嘅：正宗嘅、未染色嘅綠玫瑰實際上無花瓣——只有綠色嘅萼片。一般俾人認為送畀女朋友或老婆，代表「佢係你心目中永遠青春美麗，會同佢擁有永恆嘅愛」。
藍玫瑰：同第啲顏色嘅玫瑰唔同，藍玫瑰並唔會自然噉存在。因為噉，藍玫瑰俾好多人覺得佢代表住神秘。一般認為，如果送花嘅人想收花嘅人知佢哋係獨一無二嘅，噉一紮藍玫瑰可以係一個選擇。

故事

玫瑰同月季嘅區分

玫瑰同月季經常俾人搞亂，因為植物嘅樣相類似。雖然係噉，兩者實情差別幾大。

PK項	玫瑰	月季
相
花樣	細	大
品種	單調	超多
葉	細葉7嚿斑紋比較深兼冇光澤	大葉3~5嚿斑紋比較淺兼有光澤
莖	比較多刺	冇乜刺
園藝	唔理佢喺古代定而家：都係得單一品種	現代又一個品種傳統又一個品種古老又一個品種
植物學分類	植物界 Plantae > 被子植物門 Angiosperms > 單子葉植物綱 Liliopsida > 薔薇目 Rosales > 薔薇科 Rosaceae > 薔薇亞科 Rosoideae > 薔薇屬 Rosa	植物界 Plantae > 被子植物門 Angiosperms > 單子葉植物綱 Liliopsida > 薔薇目 Rosales > 薔薇科 Rosaceae > 薔薇亞科 Rosoideae > 薔薇屬 Rosa > 薔薇亞屬 Rosa > 月季組 R. sect. Chinenses > 月季 R. chinensis

玫瑰同月季之所以俾人成日搞亂，係因為佢哋兩個喺英文都喺嗌「rose」。大概係民國時期，好多文學翻譯都係講中國傳統品種嘅Rose嗌返月季，而西方嘅Rose翻譯成佢嘅所屬名——玫瑰。但喺園藝角度嚟講，唔理佢喺古代定而家，玫瑰都係個單一品種。但「玫瑰」個名好聽過「月季」，所以搞到啲文盲記者、花商，同埋啲弱智文人成日喺度猛咁吹漲、加上寫作嗰時成日用「玫瑰」而唔用「月季」，結果搞到一鑊熟^[14]。