物種
提示：呢篇文講嘅唔係品種。物種（粵拼：mat6 zung2；英文：species），或者種，日常語境入面又有叫做品種，係生物分類法最基本嘅一級，喺屬嘅下面。種係較為籠統嘅概念。一般嚟講，同一個物種嘅個體嘅生物之間喺外表、解剖結構、生理同遺傳上相似，但同其他第啲物種嘅個體唔同。有啲種嘅下面可能重會有亞種。
定義
編輯
數學化啲噉睇嘅話，每個物種係一個聚類（cluster；可以睇埋聚類分析）。是但搵兩隻生物，佢哋嘅遺傳組成分別係 同 （可以用兩個向量表示），再想像以下情況：
- 如果 ，當中 係某啲特定數值（即係兩隻之間嘅遺傳差異有返咁上下細），兩者就會有能力配種（假設兩者係一公一乸，或者呢種生物係公乸同體）生出有生殖能力嘅後代；
- 如果 嘅值有返咁上下大，兩者可能會生得到後代，但生到嘅後代會缺乏生殖能力，例子可以睇獅虎（Liger；獅子同老虎嘅混種，獅虎好多時冇生殖能力[1]）；
- 而如果 數值好大，兩隻生物配種唔會生到任何後代[2]。
一個物種就係一個聚群－同一個物種嘅個體彼此之間差異細到能夠配種，但是但搵其中一隻，嗰隻同聚群外嘅個體之間嘅差異大到唔能夠配種，呢個諗法就係所謂嘅生物物種概念（The Biological Species Concept；BSC）。靠住呢個基本諗法，再加埋物種之間嘅遺傳差異同化石等嘅資訊，生物分類學家能夠將生物分類。舉個例說明，鯨目（Cetacea）有以下呢啲科同屬：
- 目：鯨目
呢個分類源自對各種鯨目動物嘅遺傳因子嘅分析以及化石證據。個分類表示，樽鼻海豚同太平洋樽鼻海豚有個共同祖先（一個好耐之前存在過嘅原始樽鼻海豚屬物種），樽鼻海豚亦都同殺人鯨有一個共同祖先（海洋海豚科原始物種），而後者久遠過前者。
物種形成
編輯物種形成（speciation）係指「本來同屬一個物種嘅族群分開，並且各自獨立發展做兩個或者以上唔同物種」嘅過程[3]。
形成機制
編輯物種形成主要有兩大機制：異域性（allopatric）同埋同域性（sympatric）。異域性指多過一個族群嘅生物受地理上嘅隔離而由同一個物種變成多個唔同物種嘅過程[4]，例如係因為遷徙等嘅原因同一個物種分開做幾組，搬去唔同嘅地方度住，再分別噉適應各自嘅環境而進化，如果佢哋要適應嘅環境唔同或者有明顯嘅基因漂變，進化到咁上下呢幾組之間嘅差異會大到冇能力同對方配種－變咗做唔同嘅物種。呢種分化喺人身上都睇得到：各個人種嘅膚色等特徵因為住嘅環境唔同而進化到唔一樣，只不過係人仲未分化到冇能力彼此之間配種，所以仲算係同一個物種[3]。如果將異域性物種形成嘅過程畫做抽象化嘅圖解（色水表示基因庫嘅特徵）：
-
Original population－原初族群
Geographical barrier－地理分隔
Reproductive isolation－繁殖上嘅分離
.png)
另一方面，同域性物種形成係指有個新物種去到某一個環境，同一個固有物種喺同一個地區度住，但因為繁殖或者溝通等嘅行為差異而同唔到對方配種，最後兩者分化到變做兩個唔同嘅物種，例如係印尼就有一種蝙蝠因為佢哋之間把聲有差異，而且佢哋係靠認對方把聲嚟搵伴侶嘅，搞到佢哋產生咗幾個把聲唔同嘅族群。呢幾個族群仲要拒絕同其他族群交配，最後產生咗三個從來都未雜交嘅族群[5]。如果畫做抽象化圖解嘅話：
-
Original population－原初族群
Isolation－（因為地理以外嘅因素造成嘅）分離
同域性物種形成可以再細分做兩種：近域性（peripatric）同埋鄰域性（parapatric）[3]。近域性物種形成指一個族群地理上同原本嘅族群隔離咗，打後因為呢個新族群擴大而同本嚟嗰個族群有接觸，但喺呢個時候兩個族群嘅差異經已大到配唔到種－變咗做兩個唔同嘅物種[6]；鄰域性物種形成指嘅係一個族群分咗個細族群出嚟，而呢個細族群搬咗去就喺旁邊嘅地區度住，雖然兩個族群喺地理上相連，但係某啲交流上嘅困難搞到佢哋最後分化咗做唔同嘅物種[7]。
-
兩隻嚟自唔同地域嘅黑脊鷗 -
黑脊鷗嘅居住地分佈；相鄰地區嘅黑脊鷗族群先至有能力同對方配種。
最出名嘅鄰域性物種形成例子係環狀物種（ring species）[3]。環狀物種係生物學上一個廣受討論嘅進化現象：一柞族群分別噉住喺一柞相鄰嘅區域嗰度，因為上述嘅進化過程令到佢哋當中地理上離對方愈遠嘅族群（遺傳上）愈係同對方唔同，而相鄰嘅族群之間嘅相似性高到足以同對方配種，但唔相鄰嘅族群就做唔到呢樣嘢。住喺北極圈嗰頭嘅各黑脊鷗（學名：Larus argentatus）族群就係噉樣[8][9]。
概念衝擊
編輯
環狀物種等嘅現象反映出「物種」之間嘅分界查實係有些少含糊嘅。喺進化嘅過程入面，一個族群係慢慢噉變樣嘅，由一個物種進化到變成第個物種（宏進化）嘅過程唔係一吓就變出嚟，而係慢慢逐啲逐啲噉變嘅，所以同一個族群入面兩代之間實有配種嘅能力，世代同世代之間嘅差異唔係「一係就似一係就唔似」，而係「有幾似」：一般嚟講，假設冇乜嘢好勁嘅突變，第 1 代同第 10 代之間嘅差異會大過第 1 代同第 2 代之間嘅；而第 1 代同第 100 代之間嘅差異又會大過第 1 代同第 10 代之間嘅。如此類推，個族群慢慢噉變吓變吓，（譬如）可能去到第 500 代，佢哋先會同第 1 代差異大到冇能力配種，之但係喺呢個情況嗰度，第 250 代同第 1 代有能力配種，而第 250 代又有能力同第 500 代配種。因為噉，對於進化嘅研究令到科學界理解到一點：唔同嘅生物「物種」之間查實冇話有乜嘢完全明確嘅分界線（可以睇埋聚類分析），而物種呢個概念到咗廿一世紀初，科學界一般都當佢只不過係一種為咗溝通方便嘅用詞，而唔係一個嚴謹嘅科學概念[10][11]。
生態概念
編輯睇埋
編輯引咗
編輯- ↑ Wood, G. L. (1983). The Guinness Book of Animal Facts and Feats. Sterling Publishing.
- ↑ Leuschner, D. (1991). A mathematical model for classification and identification. Journal of classification, 8(1), 99-113.
- ↑ 3.0 3.1 3.2 3.3 Gavrilets, Sergey (October 2003). "Perspective: models of speciation: what have we learned in 40 years?". Evolution. Hoboken, NJ: John Wiley & Sons on behalf of the Society for the Study of Evolution. 57 (10): 2197–2215.
- ↑ Campbell N.A. & Reece J.B. (2002). BIOLOGY, 6th edition. Benjamin Cummimgs. p. 469.
- ↑ Sciscape 新聞報導 - 生物：蝙蝠叫聲的種化契機。
- ↑ Templeton, Alan R. (April 1980). "The Theory of Speciation VIA the Founder Principle". Genetics. Bethesda, MD: Genetics Society of America. 94 (4): 1011–1038.
- ↑ Antonovics, Janis (July 2006). "Evolution in closely adjacent plant populations X: long-term persistence of prereproductive isolation at a mine boundary". Heredity. London: Nature Publishing Group for The Genetics Society. 97 (1): 33–37.
- ↑ Carl Zimmer, 2005.《演化-一個觀念的勝利》。唐嘉慧，譯。時報文化。 ISBN 978-957-13-4241-2.
- ↑ Dawkins, R. The Ancestor's Tale, 2004: 303.
- ↑ Sober, E. (Ed.). (1994). Conceptual issues in evolutionary biology. Mit Press.
- ↑ Hull, D., 1965, "The Effect of Essentialism on Taxonomy: Two Thousand Years of Stasis", British Journal for the Philosophy of Science, 15: 314–326, 16: 1–18.
