珍珠雞 (點心)

珍珠雞係廣東點心嘅一種，由糯米雞演變出來。製法同樣係用荷葉包住糯米，但入面就改為放雞肉碎、豬肉碎、少少蛋黃嘅餡料，蒸熟而成，體積只係糯米雞嘅三分之一至一半。

珍珠雞

珍珠雞出現喺1980年代中，由於傳統嘅糯米雞嘅份量比較大，容易飽肚，飲茶嘅客人就會叫少其他點心食，影響收入，有師傅就諗出份量比較細嘅珍珠雞，一籠有兩至三件。家陣香港好多酒樓都淨係會賣珍珠雞而唔賣糯米雞。