理想氣體狀態方程式

理想氣體狀態方程式係熱力學入面形容理想氣體狀態嘅方程式，公式係：

$pV=nRT$

p係氣體嘅壓力，V係氣體嘅體積，n係氣體嘅物質量，R係理想氣體常數，T為氣體嘅溫度。

基礎

睇埋：熱力學

想像一位想研究熱力學嘅人攞住手上嘅溫度計同「溫度係溫度計反映嘅物理量」嘅知識。佢可以觀察得到壓力（$P$；指一件物體表面每單位面積承受緊幾大嘅力）嘅現象：佢將一團溫度喺攝氏 20 度嘅氣體封實喺一個透明嘅容器裡邊，跟住佢就將嗰團氣體同個容器加熱（例如放入去一煲滾水入面）；如果個容器有個蓋而且溫度夠熱，可以搞到個蓋（如果個蓋夠輕）飛走－個蓋實係受咗一股力得到動量。

一煲水喺度滾緊；由煲蓋嘅郁動可知，蒸發緊嘅水（蒸汽）會向周圍嘅表面施壓力。