生菜魚肉，又叫生菜魚肉湯，係香港街頭小食之一，喺1960年代至1980年代小販流行嘅時代，由賣碗仔翅嘅小販一齊賣，當時部份食客甚至會將碗仔翅同生菜魚肉溝埋一齊食。
生菜魚肉嘅主要材料係生菜絲、鯪魚肉同清湯。做法係將鯪魚肉加入生粉、蝦米同蔥花打到起膠，然後用筷子將魚肉削進熱湯度煮熟，魚肉落入湯度會呈條狀，最後將煮熟嘅魚肉、湯同生菜絲溝埋就得，可加入麻油同胡椒粉調味。
