產品生命週期 (市場學)

喺市場學上，產品生命週期（英文：product life cycle）係指一件產品喺出街之後一段時間內嘅銷售量嘅唔同階段變化。

階段

一般嚟講，除非一件產品係一啲生活必需品，否則件產品會經歷以下呢四大階段^[1]^[2]：

進入階段（introduction）：件產品啱啱出街，銷售量一般會慢慢噉增長，有唔少買家都肯試吓買件產品；不過因為多數買家都仲未熟識件產品，所以就算件產品設計得好，啲買家買嘅意慾普遍仲未係咁大，好多買家仲係想（例如）聽吓買咗件產品嘅人嘅意見先決定買唔買。
增長階段（growth）：件產品出咗街一段時間，喺市場上經已有一定數量嘅買家會習慣性噉買件產品，有更多嘅買家開始知道件產品存在同埋（假設件產品有返咁上下質素）聽過有關件產品嘅正面嘢；競爭者亦會開始嘗試複製件產品嘅優點，而賣家因為出現競爭而好多時焗住要減價。喺市場學上，「買家平均要買咗幾多件先會開始變成習慣性噉買」係一個受關注嘅課題。
成熟階段（maturity）：生產者夠嗮時間做研發，所以件產品嘅生產成本明顯跌咗，同時個市場嘅買家幾乎全部都經已識得件產品，即係話個市場嘅增長潛能開始見頂；就算係個市場最勁嗰啲生產者，佢哋都開始發覺件產品嘅銷售量唔再點樣升，於是有愈嚟愈多嘅競爭者有誘因離開個市場。
衰竭階段（decline）：件原先產品開始唔再啱個市場－新嘅產品係噉出現，呢啲新產品當中好多都會係件原先產品嘅替代品；因為呢啲原因，件產品嘅銷售量開始跌。一旦銷售量跌到咁上下，生產者正路會揀放棄件產品，最後件產品就會停產。

如果 Y 軸做銷售量，X 軸做時間，市場學上嘅產品生命週期可以畫成附圖噉嘅樣。

睇埋

文獻

Day, G. "The product life cycle: Analysis and applications issues", Journal of Marketing, 45, Autumn 1981, pp 60-67.

攷

↑ Singh, M. (2012). Marketing mix of 4P's for competitive advantage^{[失咗效嘅鏈]} (PDF). IOSR Journal of Business and Management, 3(6), 40-45.
↑ Grieves, Michael (2005). Product Lifecycle Management: Driving the Next Generation of Lean Thinking. McGraw-Hill.

[1] Singh, M. (2012). Marketing mix of 4P's for competitive advantage^{[失咗效嘅鏈]} (PDF). IOSR Journal of Business and Management, 3(6), 40-45.

[2] Grieves, Michael (2005). Product Lifecycle Management: Driving the Next Generation of Lean Thinking. McGraw-Hill.

[1]

[2]