留守兒童

留守兒童係指由於父母一方或者雙方出外去城鎮打工而被留喺家鄉或者寄宿喺農村親戚屋企，長期同父母過住分開居住、生活嘅細路。

留守兒童

留守兒童現象一般只會喺中國大陸被提及，亦係中國近年出現嘅一種嚴重社會現象。呢啲細路所居住嘅農村往往缺乏社會同經濟基礎設施，而呢啲設施更加容易喺城市地區獲取。留守兒童嘅出現係由於現代化嘅發展而導致大批農村剩餘勞動力向城市轉移，係中國目前城鄉二元體系鬆動嘅產物。喺留守家庭入面，父母需要外出到城市打工以維持生計，但係由於佢哋負擔唔到過高嘅城市生活成本而唔可以接仔女去城市或者留喺身邊。但出現呢個社會現象正係嗰時留守屋企嘅兒童正處於成長發育時期，由於同父母嘅分開而缺少必要嘅思想指導同觀念塑造，更係缺少父母關注同呵護而導致留守兒童出現孤僻內向、情緒消極、自覺性差、膽小怕事等心理缺陷。更嚴重嘅係，係某啲地方，甚至出現「留守童工」現象。根據2000年第五次人口普查資料顯示，中國農村留守兒童已接近2000萬人。根據2013年5月發布嘅一份中國官方機構調查顯示，留守兒童據估算已超過6000萬。留守兒童嘅比例大約為20%，即係平均5個中國細路入面就有一個係留守兒童。留守兒童為中國社會一個大隱憂，呢6千萬人喺缺乏照顧同家庭教育下，形成各種人格或者心理缺憾，成年後更加可能隨父母腳步，繼續被社會邊緣化，難免引發各種社會問題。

成因

中國東部沿海城市較多就業機會，人工亦相對比西部高

城市化同農村向城市遷移問題

自從改革開放政策實施以嚟，中國經歷咗急速經濟發展。即使成個國家都有顯著嘅增長，但係地區分配唔平均嘅增長導致咗城市同農村，即中國東部同西部以及有錢人同窮人之間造成兩極化。唔平均嘅發展導致咗農村人民向城市遷移原因之一，呢種遷移同城市化過程並駕齊驅。根據2015年收集得到嘅人口普查數據，隨住中國城市化加快，超過一半人口住喺城市地區。另外，將農業用地轉做商業用途令到農業工作可行性同利潤降低。呢個情況促使越嚟越多人由家鄉搬去城市，搵較高人工工作。同收入有關以及同勞動力有關推動農村人口向城市遷移，呢個城市化現象促使中國出現流動兒童同留守兒童現象。

戶籍制度

戶籍制度係一種喺中國實施嘅制度，佢要求住喺特定地區嘅國民以居民同家庭為單位進行登記。呢個體系通常被認為係喺中國創造階級分配嘅手段。呢個系統用嚟控制同監視人口同國內部搬屋嘅工具。佢亦係分配公共服務同資源嘅基礎，決定一個人喺特定地區可能獲得嘅社會福利（包括教育、住房同醫療服務）。如果住喺原户籍以外地區，就唔可以獲得呢類優待同服務。由於喺户籍以外地區獲取教育資源有障礙，佢哋不得不將佢哋仔女送去農民工學校，或者將仔女留喺農村家鄉，導致中國留守兒童增加。即使後來有政策禁止好多城市嘅贊助費以放寬學校錄取，但係仍然存在好多問題。2014年12月，中華人民共和國嘅法律事務辦公室提出咗一項户藉登記改革，要求拆除小城鎮嘅戶籍制度，同放寬對中等城市嘅控制。

現況

根據中國2010年第六次人口普查，推算出全國有6102.55萬留守兒童，佔農村細路嘅37.7％同全國細路嘅21.88%。佢哋唔單止分佈喺中國中西部經濟唔發達城市，亦分佈喺江蘇、廣東、山東等經濟較發達嘅省份。中國西南西北地區嘅留守兒童問題較中部或者東部嚴重。值得注意嘅係，四個地區入面，有女童家庭（喺一孩政策下，大部分家庭只有一女或者仔）中，阿媽外出比例比較高。呢個可以歸因於重男輕女嘅中國傳統文化入面，生女嘅家庭面臨較大壓力，導致外出打工。甚至阿媽因為生女而導致離婚，迫不得已外出工作。近60%留守兒童唔清楚父母工作，30%細路一年只可以見到父母一兩次，15%細路甚至一年見唔到父母一次。10%嘅留守細路每三個月同父母聯繫一次、10%嘅細路每年只能同父母聯繫一兩次、4.3%（即係大約262萬）學生成年都無同父母聯繫。總而言每年同父母聯繫少於3-4次嘅學生有1518萬。

絕大部分留守兒童都有接受義務教育。喺學業上嘅表現同非留守兒童比較無特別唔同。玩樂時間亦無咩差異，做家務時間只係略多於其他細路。留守兒童嘅零用錢同非留守兒童基本上一樣。

影響

留守兒童主要面對安全同心理健康問題。普遍嚟講，啲人都假設留守兒童係一個有問題群體。

安全問題

喺2014年研究入面，發現49.2%留守兒童曾經遭遇意外傷害，比非留守兒童高出7.9百分比。遭遇割傷、燒傷、燙傷、畀貓狗抓傷咬傷同跌傷亦分別比非留守兒童高出5.3、 1.6、3.9同3.1百分比。留守兒童嘅住院率亦較高，兒科新入院患者中，留守兒童佔咗61%（4280例） 。2013-2014年期間，媒體曝光嘅女童性侵案件高達192宗，其中留守女童受侵害案件佔55.2%。

貴州畢節係其中一個留守兒童受意外嘅重災區，包括2012年5個細路因避寒，喺垃圾箱內生火取暖導致一氧化碳中毒死亡（2012年貴州畢節兒童死亡事件）、2014年12名女童畀男教師強姦，當中11位係留守兒童。2015年4名留守兒童喝農藥集體自殺（2015年貴州畢節兒童死亡事件）。

其他案例分別為：

2010年，陝西扶風縣杏林鎮5名六年級學生相約到古廟喝農藥自殺。2名經搶救後脫險，3人無事。當中4名為留守兒童。

2011年6月，西安藍田縣孟村鄉嘅10歲留守兒童話畀哥哥聽要飲農藥自殺，半個鐘後飲咗半斤敵敵畏自殺身亡。呢件事唔單係關於留守兒童問題，亦涉及課業太多、老師體罰問題。事後父母唔敢再將哥哥留低，帶佢去新疆做嘢地方一齊住。

2013年6月，江西省南昌市生米鎮三名留守兄妹喺池塘戲水時浸死，父母當時都喺外地打工。

2014年1月，安徽望江縣嘅留守少年因為接到媽媽電話話今年唔可以返屋企過年，喺屋外廁所自縊。

2014年4月，12名女童控訴學校老師威脅佢哋後加以性侵，其中11名為留守兒童。

2015年6月，湖南省衡陽市衡陽縣。兩姐妹喺放學路上畀人投毒致死，凶手係鎮入面12歲留守女孩陳曉雯。佢喺交代自己投毒殺死兩個女孩嘅過程後，多次詢問陪同老師：「我幾時可以返去返學？」可以睇到佢對生命、犯罪、法律完全無概念。換言之，最應該被好好教育嘅年紀，無人話畀佢哋知咩叫對錯。

2015年10月，湖南邵陽邵東縣三名在校學生，入室搶劫當地小學宿舍，持木棒毆打一名看守宿舍嘅女教師令到佢死亡，搶走佢手機同2,000蚊人民幣。案發後，三人並無逃跑，佢哋攞往搶劫返嚟嘅錢，到縣城網吧打咗一個通宵遊戲。被捕時一個返緊學，而另外兩個喺網吧玩緊。

2016年6月，陝西省寶雞市眉縣兩名留守兒童誤將農藥當作飲品，飲咗半個鐘送院搶救無效。

心理健康

2020年8月8號，貴州「00後」女孩成立志願服務隊陪山區細路過暑假

以下係留守兒童主要嘅心理同行為特點：

1. 自我意識方面，佢哋可能有嚴重自卑感，對自身的智力、外貌評價偏低（部分會偏高），但又明顯咁表現得自我中心，對人哋說話聽唔入耳。
2. 情緒唔穩定，容易有身心症（即係身體出現胸悶、心悸、頭痛、偏頭痛、氣喘、皮膚搔癢、胃潰瘍，或者同精神有關嘅疲勞、頭痛、注意力唔集中、肌肉或者關節痛、記憶力減退、沮喪或者焦慮等症狀，藥物無法醫治，相信同個人情緒問題有關）以及敵對行為。患焦慮或者抑鬱比例高過其他細路。另外，年紀愈細或者女性較常出現以上問題。女生較常感到煩躁、無故發脾氣。總體嘅迷惘同煩亂指數較非留守兒童高。
3. 將挫折歸因喺自己以外嘅人或者事，並以幻想、合理化、退避等唔合理方式應對
4. 對父母充滿怨恨，盲目反抗，部分會報復。
5. 喺人際關係方面，佢哋表現得較內向，較常受欺負／攻擊。同時亦出現為人較偏執或者強迫他人清況。
6. 喺學業方面，佢哋學業成績容易下滑，男生厭學、逃學或者綴學比例亦較高。
7. 有較多不良行為，例如食煙、酗酒，甚至違法行為，例如非法賭博、偷竊或者搶劫。
8. 寄宿嘅留守兒童生活習慣較差，對生活滿意度相對低。
9. 阿媽外出嘅留守兒童喺以上問題表現得較多／嚴重。

但係唔同嘅留守兒童表現有較大差別，視乎佢哋抗逆能力，亦令留守兒童嘅成績兩極化。母子分離嘅時間、分離時嘅年齡、佢哋性別、年級、同父母嘅溝通方式同頻率等因素亦令到留守兒童有個體嘅差別。

教師對班級上留守兒童嘅數量、情況都唔清楚，估算班上留守兒童嘅數量大大低過實際上數量。佢哋只注意到有情緒或者行為問題嘅留守兒童。

西北同西南地區農村細路情緒狀況明顯比東部同中部地區細路消極。

自殺傾向

根據一項小型研究，14-16歲細路入面，37% 曾經有自殺念頭、12%曾計經劃自殺、6.3%曾經有自殺行為。若果父母都喺屋企，仔女有自殺念頭大約係30%，如果父或母外出打工嘅話，留守兒童產生自殺念頭機會超過6成。

犯罪率

呢幾年嚟判決生效嘅未成年人罪案按年上升13%，當中留守兒童的犯罪率約莫係未成年人犯罪嘅70%。

睇埋

• 城鄉差距
• 農民工