發現者

《 發現者（粵拼：faat3 jin6 ze2） 》（英文：Discoverer）係一套由連震東基金會籌劃，華暘傳播公司製作嘅系列紀錄片，獲教育部推薦爲優良文化教育節目，曾喺臺灣公共電視分104集播出，爾後又喺東森臺重播。

發現者
DVD合輯封面
類型	紀錄片
開創	連惠心
國家／地區	中華民國
語言	國語
集數	104（公視播出） 91（DVD發行）
每集長度	45–65分鐘

概述

呢個係首套由臺灣自製嘅歷史文化紀錄片，自1996年起，由連戰之女連惠心擔綱策劃，據佢友人話，佢籌拍《發現者》打算做成臺灣版嘅《Discovery》，全部實地取景拍攝。呢套系列片早期嘅外景主持人包括任賢齊、九孔、許傑輝，佢哋曾爲咗《發現者》遠赴埃及出外景。

《發現者》從人類文明起源開始，進而述及世上各國嘅文明歷程，涵蓋13個主題：《人類文明起源之旅》、《西方文明起源之旅》、《中國文明之旅》、《回教文明、東方印度與佛陀文明之旅》、《羅馬文明興衰之旅》、《基督教文明之旅》、《絲路文明之旅》、《失落的文明之旅》、《世紀藝文之旅》、《近代歐洲躍進之旅》、《俄羅斯文明之旅》、《日本文化之旅》。沙鷗國際多媒體推出呢套劇嘅DVD，共91集，亦以呢種主題分輯推出。

內容簡介

分輯DVD封面同全集一覽表。

• 《人類文明起源之旅》（1–10集）：上古人類文明之源起綜述，繼而分述美索不達米亞文明、古埃及文明、歐洲巨石文化。
• 《西方文明起源之旅》（11–18集）：克里特文明、古希臘文明、希臘化文明時期同埋波斯帝國文化。
• 《中國文明之旅》（19–32集）：從遠古時代至清朝嘅文明歷程，本系列最後一集講述臺灣荷蘭統治時期嘅歷史文化。
• 《東方印度與佛陀文明之旅》（33–37集）：古印度文明同印度佛教文化。
• 《羅馬文明興衰之旅》（38–44集）：薈萃古羅馬歷代文化，源起、發展、興衰、滅亡。第40集專講龐貝古城。
• 《基督教文明之旅》（45–55集）：從猶太教時期開始講起，囊括羅馬帝國時代、拜占庭帝國時代及至中世紀歐洲嘅基督宗教歷程。
• 《回教文明之旅》（56–58集）：回敎嘅發展歷程同鄂圖曼帝國。
• 《絲路文明之旅》（59–64集）：絲綢之路上嘅文明，敦煌、西域古國同埋絲路宗教。
• 《失落的文明之旅》（65–71集）：美洲三大文明瑪雅、印加、阿斯達嘅興衰史。
• 《世紀藝文之旅》（72–75集）：述說莎士比亞、文藝復興、巴洛克藝術同文化嘅俄羅斯等主題。
• 《近代歐洲躍進之旅》（76–80集）：地理大發現、啓蒙時期、法國大革命、工業革命同19世紀諸多嘅文化藝術流派。
• 《俄羅斯文明之旅》（81–85集）：從俄羅斯嘅誕生開始講起，維京血統、基輔受洗、俄羅斯統一、彼得大帝西化、沙皇俄國嘅黃金時代至末代沙皇。
• 《日本文化之旅》（86–88集）：由講述早期歷史嘅「太陽之子」、中世嘅「日本之戰國霸業」同「近代日本」組成。
• 唔分系列（89–91集）：由講述第一次世界大戰嘅「戰爭與和平」、第二次世界大戰嘅「蒼白之路」同最終集「發現未來」組成。