白藤江之戰 (938年)

938年嘅白藤江之戰（粵拼：baak6 tang4 gong1 zi1 zin3，越南文：Trận Bạch Đằng,938／陣白藤,938^?），即係喺五代十國陣，嶺南嘅南漢政權同靜海地區（而家越南嘅北部）嘅軍閥吳權之間嘅戰爭，以戰事地白藤江做名。呢一戰以吳權擊敗咗南漢告終，然之後越南（交趾）開始咗脫離中國大陸政權嘅獨立發展路。

938年白藤江之戰
嶺南南漢國攻打越南北部嘅戰事嘅一部分
描繪咗938年吳權帶兵，同南漢軍喺白藤江交戰嘅東湖版畫，呢種畫係越南民間嘅獨特藝術。
日期： 938年 地點： 越南北部白藤江 結果： 吳權擊敗咗南漢軍隊，開始咗獨立建政嘅歷史
參戰方
南漢	交趾
指揮官同領導者
劉弘操 †	吳權
兵力
10000人	不詳
傷亡同損失
5000人以上	不詳

背景同前戰

喺930年，南漢君主劉龑派咗李守鄘、梁克貞去攻打交趾，俘虜咗靜海節度使曲承美後就返咗去。冇耐曲氏嘅部將楊廷藝，就驅逐咗南漢啲軍隊，自己改做靜海節度使。喺937年，楊廷藝畀牙將矯公羨殺咗。到咗938年，楊廷藝嘅女婿吳權就喺愛州（而家嘅清化）起兵，反對矯公羨。佢召集同帶埋啲部隊由愛州去到咗安南嘅北面，包圍同攻打矯公羨所在嘅大羅城（亦即係螺城），俾包圍嘅矯公羨試過突圍未有得米，於是乎佢就向南漢政權求救，喺度等著有援軍打救佢。

劉龑喺呢一場仗前早就有吞併返交趾嘅諗法，隨即任命咗個第九仔劉弘操做靜海節度使，封埋佢做交王。劉弘操就以支援矯公羨嘅名堂，帶領超過二十萬人進入交趾去支援公羡嘅軍隊，而劉龔自己就喺海門（而家嘅廣西博白）度屯兵，做佢仔嘅後應。南漢崇文使蕭益認為喺發兵嘅呢陣時，啲時節雨多而且啲路都幾難行下，勸諫劉龑暫時放慢進兵嘅速度，仲建議要多啲用嚮導幫手帶路。蕭益佢係咁話嘅：

「	而今，啲雨已經落咗幾個禮拜咁耐，海上路線既危險又漫長。吳權係一位才華橫溢嘅戰術家。我哋唔能夠睇低佢。我哋嘅軍隊必須要謹慎起身，喺向南方慢慢噉前進嗰陣，我軍應該盡量用多啲偵察兵。	」
——南漢崇文使蕭益

但係，劉龑嘅諗法係快快趣趣打過去，好重新噉征服靜海，因而佢冇聽蕭益嘅笛，叫劉弘操嘅水軍繼續進兵，由海口（下龍灣）度進入咗白藤江。

喺劉龑調緊兵嘅同一時間，包圍著大羅城嘅吳權部隊猛攻，趁南漢後援軍隊嚟到前，攻到咗入城同殺死咗矯公羨。

戰役經過

白藤江之戰嘅精品畫，係放喺越南河內嘅國家歷史博物館度向公眾展示

吳權得知南漢嘅部隊嚟到咗白藤江，就同啲將士講：

「	弘操𪜀侈稚疴𤵺，𨑻軍自賖旦，軍𪜯群痗𤻻，又𦖑公羡㐌𣩂，空固𠊚爫内應，㐌𠅎𤽶𠓀耒。軍些𥚄飭群劸敵𠇍軍痗𤻻，必破得。仍𦏓眾固利於戰船，些空防備𠓀時勢得輸𣗓别𠚢哰。𡀮差𠊚𨑻梮𢀲襪鈍頭𢃉鉄㨂砛於𠠩𨷯㴜，船𧵑𦏓眾遶渃潮𨖲𠓨𥪝行梮時𡢐𪦆些易皮制御，空朱隻鬧𠚢脱。 （劉弘操係個又憨居又冇腦嘅青頭仔，由咁遠水路帶啲兵嚟，啲兵仔實都好攰，又聽聞矯公羨死咗，冇人做內應，首先經已失咗魂喇。我軍有力而敵軍疲攰，實贏到佢。但佢哋好識行戰船，我哋唔防備先嘅話，會輸都未定。若果派人去帶啲木樴（亦即係木樁）、頂度包埋鐵，喺臨海口前邊水底閘住，佢哋啲船（一旦子）順潮水升漲入到啲木樴（範圍度）、我哋就容易控制，唔會畀任何一隻船走甩。）	」
——吳權

於是佢就命令啲手下軍士去斬咗啲樹木，愛來整啲木樴（粵拼：zik1 ），插喺白藤江入海處啲險要江心度，同時間喺河岸一帶部署埋伏。

白藤江嘅水呢陣漲潮而升高埋，浸過曬啲帶鐵皮木樴畀人睇唔到。吳權當即叫水軍部隊去挑機，嘍啲南漢軍入港。吳軍戰鬥咗一陣就詐弟打敗仗後退，南漢水軍就跟住向前追擊，追到咗吳部隊嘅埋伏嘅位置。冇耐江水退潮，啲鐵皮木樴突晒出嚟，唔少南漢部隊嘅大船一埋到去，一係就俾閬（粵拼：long6 ）高炕沙（擱淺嘅傳統說法）喐唔到，一係就畀㓤穿個船底、一部部噉沉晒落去，唔少兵跟住浸死咗。吳軍啲伏兵就跟住出晒嚟，出動啲船仔去襲擊南漢軍，兩軍間變成咗白刃戰。呢一戰令到南漢軍大敗，損失咗超過一半嘅卒仔，主將劉弘操就畀擊殺埋。

南漢君主劉龑得知劉弘操冇咗之後，喊到好犀利，帶住殘餘嘅部隊退返南漢本土。

戰後

吳跟住喺939年稱王，建立咗吳朝，都城係古螺城。由呢陣吳建政開始，南漢唔再南下攻打交趾。越南（交趾）開始咗脫離大陸政權嘅獨立發展路；到咗968年丁朝建立，越南（交趾）正式脫離咗中國大陸嘅中原政權而獨立。

參考

參考文

• 《資治通鑑·後晉紀二》
• 《新五代史·南漢世家第五·劉隱》
• 吳士連等《大越史記全書·外紀卷之五·南北紛爭紀》同《大越史記全書·外紀卷之五·吳紀》，東京大學東洋文化硏究所校合本，170到172頁
• 《越史略·卷上》
• 《越南歷史》（Lịch Sử Việt Nam），第二部份第四章，第150頁。北京人民出版社1977年出版。編：越南社會科學委員會（越南科學出版社1972年版），譯：北京大學東語系越南語教研室（1976年3月）

睇埋

• 白藤江
• 白藤江之戰 (981年)
• 白藤江之戰 (1288年)