檔案目錄

喺電腦科學同相關領域，檔案目錄（粵音：dong2 on3 muk6 luk6），簡稱目錄，係指喺電腦嘅檔案系統入面嘅一啲目錄，負責記錄住每一個電腦檔案嘅名同位置嘅，好多時亦會記錄埋第啲相關嘅中繼資料，例如檔案大細、權限等等。

喺 GUI 裏便，檔案目錄好多時都會圖像化成一個快勞夾噉嘅樣。

比較簡單嘅檔案系統可以淨係得一個目錄咁少，但係比較複雜嘅檔案系統可以有多過一個，喺爾種系統裡便，目錄本身亦都係一種檔案，所以目錄入面可以擺目錄，所以一個目錄通常唔會有齊晒所有檔案嘅紀錄。

如果用緊圖像用家介面，檔案目錄嘅圖示通常會係好似一個快勞夾（folderfou1 daa2）噉嘅樣，噉係因為檔案目錄可以用嚟裝文件，所以就將佢比喻做一個快勞夾。

檔案目錄嘅英文名有 catalogue 同 directory 等。

咩係目錄

睇埋：電腦檔案

一個作業系統其中一個最重要嘅功能，係要永久噉記住啲數據，而且仲要畀用家有需要嗰陣攞嚟用。

要講電腦點樣儲起數據，就一定要有檔案（file）：每一個檔案都係一連串字節，字節可以讀取，又可以改寫，每個檔案都梗會有個低層嘅名，個低層名通常都係以數字形式存在嘅，例如 1001 噉，同時個檔案又會有個高層嘅名，個高層名通常比較似自然語言比較易睇，例如 ngo_go_file ​——​嚟自粵語我個快勞​——​噉。檔案目錄會負責記住佢裏面每個檔案嘅低層名係乜，同埋每個低層名對應嘅係邊個高層名。

目錄入便仲可以有目錄，形成一個分層結構，個結構可以用樹狀圖嚟表達。好似下圖噉，MFD 係所謂嘅根目錄，而 Dir X 表示第 X 個子目錄（一個子目錄係一個喺另一個目錄入便嘅目錄），File Z 表示第 Z 個檔案。喺下圖嗰個檔案目錄當中，File 2 用咗硬連結，會喺兩個唔同嘅目錄裏便出現。

絕對路徑

喺實際嘅作業系統當中，一個檔案嘅位置可以用一行字符表達：呢行字符最開頭嘅可能係某啲前綴，然後係根目錄嘅名，跟住可能係某種分隔符號，再之後係根目錄以下嘅部份，而喺呢部分入面，唔同子目錄嘅名亦會用某種分隔符號分開，最後一個目錄同檔案名之間亦用某種分隔符號隔開。目前最常見嘅係 UNIX 嘅做法：前綴、根目錄名同分隔符號全部都係 /，相鄰嘅 / 可以寫成單一個 /；用返上圖做例，假設 File 1 係一個文字文件（.txt ）佢喺目錄入便嘅位置會表示做

/Dir 1/File 1.txt

噉款，當中第一個/ 同時係前綴、根目錄嘅名同之後嘅分隔符號。

微軟 Windows 其實亦可以算係用 UNIX 嘅呢種做法，但係佢嘅前身 MS-DOS 好多嘢係跟 CP/M，/ 喺命令行介面用咗嚟表示命令選項，所以面向用家嘅分隔符號改哂做 \，亦唔係淨得一個主目錄，而係之前仲有磁碟機名（drive letter），又或者仲有伺服器名加共享資源名（share name）。

另外一個可以算係用 UNIX 嘅做法嘅係蘋果公司早期嘅一個作業系統 ProDOS，前綴係 /，根目錄係磁碟名（volume name），上面嘅例子會寫成

/MFD/Dir 1/File 1.txt

不過，UNIX 嘅做法並唔係唯一一種可能嘅做法；喺 UNIX 嘅做法未成為事實上嘅主流之前，其實有好多種唔同嘅做法。例如喺傳統嘅 MacOS（macOS X 之前），分隔符號係 :。更唔同嘅例子有例如 VMS，前綴係 [，第一個同第二個分隔符號係 .，第三個分隔符號係 ]；用 VMS 嘅寫法，上面嘅例子會寫成

[MFD.Dir 1]File 1.txt

重要操作

• 創建檔案
• 讀寫檔案
• 存取檔案
• 刪除檔案

睇埋

• 命令提示符