自然語言

自然語言zi6 jin4 jyu5 jin4（英文：natural language / ordinary language）喺語言學等嘅領域上係指一種自然噉由人類重複用嚟彼此之間溝通而演化出嚟嘅語言，例子有廣東話、客家話同英格蘭話等日常講嘢會用嘅語言。相對於（例如）程式語言等日常生活唔會攞嚟講嘢嘅語言。

「自然噉發展出嚟」呢點好重要：人造語言－即係例如奇幻作家為自己想像嘅世界作嘅語言－雖然都可以似日常講嘢用嘅語言，但因為唔係「自然噉發展出嚟」而唔俾人當係自然語言。

特徵

自然語言有異於

• 形式語言－形式語言係指啲由人特登整出嚟、隻隻符號都有固定意思嘅語言，好似係程式語言或者數學語言呀噉；相比之下，自然語言有好多不確定性喺入面（睇下面）；
• 人造語言－人造語言可以似日常講嘢用嘅語言，但係由人特登創造出嚟嘅，例如係奇幻作家為自己想像中嘅世界作出嚟嘅語言；相比之下，自然語言係源於人類喺日常生活當中講嘢同互動嘅；

自然語言有好多重要嘅特徵：

• 歧義（ambiguity）：自然語言同電腦處理開嘅形式語言好唔同：同形式語言比起嚟，自然語言成日都出現「一隻字有幾個唔同嘅可能意思」嘅情況（例子可以睇一字多意嘅問題），甚至隻字根本冇明確意思；
• 反話（sarcasm）：自然語言入面可以有反話呢樣嘢；想像一個人聽佢朋友彈結他，聽完佢就話「嘩，你彈得好好喎」－呢句嘢嘅真實意思受制於講嗰個人嘅表情同第啲身體語言影響，例如如果個人講嗰陣個表情係完全唔興奮嘅話，佢好有可能係講緊反話；由呢啲噉嘅例子可以睇得出，判斷一句嘢嘅意思嗰時唔可以齋靠字面解；
• 語言演變：一隻自然語言嘅語義同文法等嘅特性會隨時間而演變，例子可以睇潮流用語（啲人作新嘅字或者詞）嘅現象；噉亦表示，自然語言實會有不確定性喺入面，而要模擬自然語言，就要用到涉及機率嘅做法，會用類似以下噉嘅符號－

  $\Pr(S=words)$；日常用語講，呢串嘢意思係「串字（$S$）係 words 嘅機率」。

... 呀噉。

睇埋

• 語言同文字，語言同文字呢兩樣嘢緊密相關但唔同。
• 溝通
• NLP
• 聚類分析