石燕子
石燕子（1920年—1986年9月9號 [1]），原名麥志勝，香港大戲、電影男演員。
| 石燕子 | |
|---|---|
| 國籍 | 香港  |
| 職業 | 演員、電影演員 |
| 配偶 | 任冰兒 |
[改維基數據] | |
新派武狀元，文武兼備，擅長做傳統排場戲目，1930年代成名，40至50年代喺舞台上紅極一時，喺香港拍咗好多武俠電影同粵劇電影。70年代佢同老婆任冰兒嘅燕新聲劇團係香港頗有威望嘅猛班，喺紀錄片《六國大封相》可一睹佢武狀元嘅風采。
雖然石燕子年紀比何非凡後生兩歲，但何非凡都拜佢為師學藝，嗌他做師父，羅家寶亦曾經係佢旗下演員。不過1980年代佢喺香港電台《紅伶訴心聲》專訪節目入邊曾經評價，話何非凡同羅家寶都淨係專注唱腔，忽略粵劇喺表演各方面演、打、翻、唸等五功、五法藝術。
石燕子晚年嗜好騎術同國畫，生活多彩多姿。1986年7月24號，石燕子同朋友打蔴雀後，因突發性腦中風送入九龍伊利沙伯醫院[2]，其後轉送聖德肋撒醫院。入院第一個星期重清醒，同探病嘅朋友傾到偈，粵劇名伶任劍輝同白雪仙多次探望。第二個星期後病情惡化，每日處於半昏迷狀態，左邊身亦癱瘓，直到9月9號上晝9點45分病逝，終年66歲。9月12號喺九龍殯儀館以佛教儀式出殯，隨即奉柩葵涌政府火葬場火化。