票債票償」運動,係2011年一場由黃毓民領導下,人民力量發起嘅政治運動,佢哋針對民主黨民協喺2010年就香港2012年政改方案投贊成票,要喺第4屆香港區議會選舉入面向佢哋狙擊,將佢哋拉落馬。

呢個狙擊溫和泛民嘅運動,喺黃毓民仍然未退出社民連嘅時候就已經醞釀。當時,黃毓民、蕭若元等主張狙擊溫和泛民,但同社民連黨內唔少其他人有意見分歧。之後以黃毓民為首嘅一批社民連成員就退黨,另立人民力量進行呢次行動[1]

「票債票償」亦成為咗佢哋喺呢次選舉嘅主要口號之一,但除咗針對民主黨之外,佢哋亦有一啲成員同一年前反對政改方案嘅社民連公民黨直接競爭(例如:曾麗文喺深水埗美孚中選區就同公民黨嘅伍月蘭撞區)。面對呢次行動,當時有傳言話係中共背後策劃,對部分泛民主派人士進行鎅票,但呢個說法並無得到證實[2]

不過,人民力量最終只係憑麥業成攞到1個議席,同埋成功狙擊四個本身唔係黨領導層嘅民主黨候選人[3][4]

事後評論

  • 時事評論員蔡子強話,無明顯證據顯示人民力量拆走民主黨同民協嘅關鍵選票;不過狙擊行動刺激咗選民嘅投票意欲,人民力量吸引咗一批新嘅投票者[5]

後續發展

黃毓民之後喺2013年退出人民力量,本來兩個分裂嘅政黨(社民連同人民力量)關係漸趨緩和,甚至喺2016年香港立法會選舉結盟參選。

參考

  1. 蕭若元. 香港大撕裂(上): 香港的命運系列 雨傘運動.
  2. 朱國斌、朱世海 (2015). 中央與特別行政區關係專論. p. 160.
  3. 〈「票債票償」僅4區見效 黃毓民未言棄〉 互聯網檔案館歸檔,歸檔日期2016年8月18號,.,《明報》,2011年11月8號。《明報》內文假設若果人力無參選,人力嘅選票會自然轉嫁到民主黨身上。結果只有四區係人力加上民主黨選票係多過親中陣營,包括北區石湖墟選區 (N12);葵青區青發選區 (S28);荃灣象石選區 (K17) ,結果搞到民主黨蔡子民冧唔到莊;喺中西區寶翠區 (A09) 搞到民主黨楊浩然冧唔到莊。
  4. 〈人民力量「鎅票」民主派三人落馬〉 互聯網檔案館歸檔,歸檔日期2016年3月4號,.,《星島日報》,2011年11月8日。
  5. (《評台》轉載) 互聯網檔案館歸檔,歸檔日期2015年8月17號,.蔡子強:〈補遺篇:談人民力量的區選結果〉 Archive.is歸檔,歸檔日期2015-11-08,《明報》,2011年11月24號。
  6. 「麗華選區李永達敗給朱麗玲」,有線新聞,2011年11月07日 (03:08am)。