蕭若元

蕭若元（英文：Stephen Shiu，1949年7月22號—）係香港傳媒人，人稱「蕭才子」。

蕭若元
出生日	1949年7月22號  （75歲）
出生地	英屬香港
國籍	香港
母校	香港大學
職業	生意人、編劇、電視主持、新聞從業員、政治人
政黨	人民力量
仔女	蕭定一
[改維基數據]

佢早年做過新聞主播同節目主持，之後轉行做編劇，1992年更憑電影《跛豪》同麥當雄一齊攞香港電影金像獎最佳編劇。佢而家主要喺網上做時事評論員，同埋搞下唔同生意，包括財務公司易還財務，同埋飲業食務元卓集團。佢個仔蕭定一亦參與電影製作行業。2019年，蕭若元移居台灣。佢現時係知名時事評論員，經Youtube、Patreon同Clubhouse發布影片同錄音，有時又會用嗰啲平台同觀眾及聽眾即時對談。

「神燈」

蕭若元為網民熟知嘅一大特色，就係佢被戲稱「神燈」嘅能力，多數喺佢平台所談及對時事嘅估計，都會以反效果呈現返。經常畀網民用「燒山」一稱恥笑，仲成日有「燒山好嘢」哩句出現，意思啫係蕭又估錯或者係網民祈求佢講嘅嘢同現實相反。

蕭若元清楚知道網民對「神燈」嘅嘲笑，喺佢嘅 Twitter，網民曾經問佢可唔可以祈求中印兩國唔會打仗（為求「燈」中有反效果），蕭風趣回答「我知你想做乜」。

蕭亦會睇連登，有連登網民話蕭嘅 Twitter 唔係自己出帖文，蕭喺 Twitter 隨即反駁叫連登網民下次佢錄音坐定定聽晒佢。

2019年雙十一三罷當日發生黑衫蒙面示威者向持唔同意見嘅57歲男子淋潑易燃液體再放火燒人嘅馬鞍山燒人事件。蕭若元話單嘢「係假嘅、係拍戲嘅」，話被燒男子係特技演員，身上搽咗拍戲用嘅易燃物先至會瞬間着火，被淋嘅液體係道具先至好快就熄，並指稱被燒男子收咗200萬港幣報酬後製造輿論。其後醫院管理局發聲明確認傷者已被威爾斯親王醫院收治，情況危殆。