禧年 (猶太節日)

禧年（希伯來文：יוֹבֵל‎，羅馬拼音：yovel），天主教嘅思高聖經譯喜年，係猶太律法入面嘅一種節日，由上帝喺西乃山定立，每50年一次，即係七個安息年之後嗰年就係禧年，禧年規定所有地都要物歸原主，所有嘅奴隸都要放人，同埋好似安息年咁，成年唔耕田，等土地可以休養。

猶太教認為禧年嘅規定係要所有猶太人都喺以色列住嗰陣先適用，認為係利未記25章10節係聖經根據，所以已經冇守成二千年，因為已經冇守咁耐，禧年係咪50年一次，其實亦都並冇共識，而係有49年一次嘅講法，即係每七個安息年嘅第七個就係禧年，但係49年一次係比較小眾嘅講法，究竟係49年定50年一次，喺學術界到而今都仲有爭議。