科學怪人fo1 hok6 gwaai3 jan4英文Frankenstein's monster)係1818年恐怖小說科學怪人》當中講到嘅一隻怪物。

1930年代一個演員喺套戲入面扮演科學怪人嘅相

喺原版本小說入面,科學怪人係一隻由身為科學家主角出於好奇而創造嘅生物,佢嘅身體由多條唔同死屍嘅肉砌成,生得異常高大而且力大無窮,仲因為怨恨主角而殺死主角身邊嘅親友。到咗廿一世紀初,科學怪人經已成為咗恐怖故仔常見嘅橋段[1]

故仔 編輯

内文:科學怪人

"I am alone and miserable. Only someone as ugly as I am could love me." [2]

粵譯:「我覺得好孤單同痛苦。只有同我一樣咁醜樣嘅人先有可能會愛我。」
-科學怪人

喺原版小說入面,科學怪人嘅背景故仔係噉嘅:科學怪人由一位後生嘅科學家創造;科學怪人離開咗實驗室之後,就一支公去咗野外;佢發覺人類又驚又憎佢,一見到佢就攻擊,於是佢就搵咗地方匿埋;佢打後搵到間荒廢咗嘅屋,就喺嗰度定居;間廢屋隔離有戶窮困人家,係一個盲公同佢老婆仔女;科學怪人見到佢哋咁窮咁慘就心生同情,於是就暗中幫佢哋做斬柴、剷雪同其他工作;科學怪人一路喺嗰度住咗幾個月,經歷咗好多嘢-佢一路偷聽住隔離屋人講嘢一路學識講嘢,佢仲搵到其他人抌低嘅書,從而學識讀寫,而且佢睇到自己喺水入面嘅倒影,得知自己個樣好核突好得人驚;幾個月過咗之後,隨住佢一路幫手,佢對佢隔離嗰屋人愈嚟愈有好感,有一日佢上前同個盲公接觸,成功噉開展對話,但過咗冇幾耐,盲公啲老婆仔女嚟到,見到科學怪人就好驚,盲公個仔仲郁手攻擊,搞到科學怪人落荒而逃;第日,科學怪人就發現嗰屋人搬走埋。經歷咗依單嘢之後,科學怪人就放棄嗮所有嘅希望,唔再諗住自己有日可以受到人類接納。

心懷怨念嘅科學怪人打後就去搵返自己個創造者,想報仇。

個名 編輯

廿一世紀初嘅人好興用 Frankenstein 依隻英文字嚟指科學怪人依個角色,但隻字本來係主角個姓,而原版小說只係用

  • The Creature嗰隻生靈噉解,或者
  • The Monster嗰隻怪獸噉解,

... 等嘅字眼嚟描述科學家主角整嗰隻怪獸。

到咗廿一世紀初,使用英文嘅人好興用 Frankenstein's Monster弗蘭肯斯坦隻怪獸噉解)嚟指科學怪人,甚至有陣時會簡稱做 Frankenstein-依隻字本來係主角個姓,但隨住語言演變,啲人用咗隻字嚟指科學怪人[3]。喺漢語當中,啲人一般會用科學怪人依幾隻漢字嚟指弗蘭肯斯坦隻怪獸,而依幾隻漢字响粵文入面嘅讀音係 fo1 hok6 gwaai3 jan4

睇埋 編輯

編輯

  1. Hitchcock, Susan Tyler (2007). Frankenstein: a cultural history. New York City: W. W. Norton.
  2. Frankenstein Quotes. Goodreads.
  3. Frankenstein (n.). Merriam-Webster.