不死生物
(由死靈跳轉過嚟)
不死生物（粵拼：bat1 sei2 sang1 mat6），又或者叫死靈（sei2 ling4，相對生靈），係傳說生物嘅一個類別，泛指一啲明顯死咗，但能夠好似生勾勾嘅生物噉活動嘅「生物」，而佢哋嘅呢種能力源自黑魔法等嘅超自然力量。例如鬼魂同吸血鬼，都算係不死生物－兩者都係冇咗心跳同脈搏等嘅生命跡象，但就（好似生勾勾嘅生物噉）識郁動同講嘢[1]。
不死生物常見於民間傳說同埋現代嘅虛構故仔：世上差唔多所有族群嘅人，傳統上都有鬼故（講鬼嘅故事）呢家嘢；而廿一世紀初嘅奇幻故仔同恐怖故仔亦都成日提起喪屍同吸血鬼等嘅橋段。
外語嗌法
編輯
不死生物：
主要種類
編輯現代奇幻故仔等嘅作品當中常見嘅不死生物，有以下呢啲類：
- 鬼魂：指因為肉體死亡而離開咗肉體嘅靈魂，通常觸摸唔到，而且能夠穿過實體。講鬼魂嘅恐怖故仔好常見，常見到令鬼故自成一個文類。
- 喪屍：指受超自然力量影響而曉郁嘅死屍，通常行得慢、冇乜智能可言同埋會想食人肉，好多時被描繪會成羣噉攻擊生勾勾嘅人；恐怖生存遊戲好興用喪屍做最基本嘅敵人，例如《生化危機》同埋《絕命異次元》等嘅著名恐怖生存遊戲就好興用喪屍呢條橋[2]。可以睇埋骷髏妖。
- 吸血鬼：都係一種受超自然力量影響而曉郁嘅死屍；同喪屍唔同嘅係，吸血鬼郁動速度唔慢、有返咁上下智能同埋需要吸生勾勾嘅人或者動物嘅血嚟維持自己存在；吸血鬼好多時仲會具有能夠變身成蝙蝠或者心靈感應等嘅特異能力；喺弱點上，吸血鬼多數怕陽光，所以日頭嗰陣要喺棺材入面瞓覺，而除咗陽光之外佢哋好多時仲俾人描繪成怕十字架同大蒜。例如源自 1897 年小說《德古拉》嘅德古拉伯爵就係一個好出名嘅吸血鬼角色[3][4]。
- 木乃伊：本來係指喺人工防腐或者自然條件下達到長久保存嘅死屍，恐怖故仔好興講木乃伊受到超自然力量影響而曉郁變成死靈，特性上通常同喪屍類似；順帶一提，因為古埃及喺整木乃伊方面零舍出名，所以講木乃伊嘅恐怖故仔情節上好多時都同古埃及有關[5]。
- 科學怪人：源於 1818 年嘅哥德式恐怖作品《科學怪人》；喺原版個故仔入面，科學怪人係一隻由身為科學家嘅主角出於好奇而創造嘅生物，佢嘅身體由多條唔同死屍嘅肉砌成，生得異常咁高大而且力大無窮，仲因為怨恨主角而殺死主角身邊嘅親友；到咗廿一世紀，科學怪人經已成為咗恐怖故仔常見嘅死靈[6]。
- 巫妖：指用邪術令自己變成不死嘅死靈；喺奇幻故仔當中，有好多法力高強嘅死靈術士（專門用死亡相關魔法嘅魔法師）會想自己長生不死，而佢哋好多時會自願噉負出某啲巨大代價（例如係將自己嘅靈魂同人性賣俾惡魔）嚟變成巫妖得到長生；巫妖外觀上通常會有明顯「死咗」嘅特徵，例如皮膚呈灰白色，甚至係冇嗮肉得返棚骨，佢哋通常能夠保留自己生前嘅智能同法力，而且往往仲會因為佢哋通曉死靈術而成為喪屍等「低級」死靈嘅領袖；喺奇幻電子遊戲入面，巫妖通常會係大佬級嘅角色[7]。
- 殭屍（粵拼：goeng1 si1）：大中華地區傳統民間傳說當中嘅一種死靈，例如清朝野史《述異記》就有講小村落出現殭屍。喺傳統傳說入面，殭屍都係一種受超自然力量影響（例如係俾鬼上身）而曉郁嘅死屍，同喪屍一樣傾向冇乜智能，不過特徵係會以雙手向前伸直嘅姿勢跳嚟跳去，而且唔會好似喪屍噉自然腐爛。殭屍喺唐人嘅恐怖文學裏面相當常見，例如香港人拍戲就成日都拍殭屍片[8][9]。
呀噉。
類似傳說
編輯- 鬼火：植物喺沼澤裏面腐爛嗰陣會釋放氣體，引致好似火噉嘅光，呢啲光就係鬼火；中世紀嘅歐洲有好多關於鬼火嘅傳說，例如有傳說話一笪位置有鬼火，表示有仙子喺嗰度埋咗堆黃金，又有講法話鬼火本身係種靈或者仙子，會引誘人跟佢入去（好多時充滿咗有毒嘢嘅）沼澤[10]。
- 報喪女妖：愛爾蘭民間傳說入面嘅一種靈異生物；根據傳說，當一個人就嚟要死嗰陣，報喪女妖可能會現身，報喪女妖會喺即將要死嗰個人屋企外尖叫或者喊，而佢嘅叫聲往往會令周圍嘅人不寒而慄；外形上，報喪女妖多數會係年老嘅女人、著住長同灰黑色嘅斗篷、而且對眼因為喊得多而紅嗮[11]。
- 都拿痕：愛爾蘭民間傳說入面一種近似邪靈噉嘅仙子；佢最重要嘅特徵係個頭甩咗落嚟，而且佢仲會一手攞住佢自己個頭、一路騎住隻黑色馬，喺最黑暗嘅夜晚現身；佢可能會攞住條人類嘅脊骨當鞭噉用，或者佢隻馬會拉住架用人嘅骨同皮膚造嘅馬車；有傳說話，一旦都拿痕嗌某個人嘅名，嗰個人就會即刻當場暴斃[12]。睇埋無頭騎士。
- 食屍鬼：源於遠古阿拉伯地區嘅傳說生物；响廿世紀起嘅奇幻當中，食屍鬼通常係種死靈，源於生前好鍾意食肉嘅死人；《龍與地下城》（D&D）就有講到食屍鬼一路全身發出腐爛嘅惡臭，一路食死屍肉或者去捉生勾勾嘅人嚟食[註 1][13]。
呀噉。
|
睇埋
編輯註釋
編輯- ↑ 不過呢種形象同遠古阿拉伯傳說入面嘅有啲唔同。
引述
編輯- ↑ Stoker, Bram (1975) [1897]. Leonard Wolf (ed.). The Annotated Dracula. Crown. p. 193.
- ↑ Botting, F. (2011). Zombie death drive: Between gothic and science fiction. Wasson and Alder, 36-54.
- ↑ Clive Leatherdale (1985). Dracula: the Novel and the Legend. Desert Island Books.
- ↑ Stoker, Bram (1975) [1897]. Leonard Wolf (ed.). The Annotated Dracula. Crown. p. 193.
- ↑ Daly, Nicholas (February 10, 2000). Modernism, Romance and the Fin de Siècle: Popular Fiction and British Culture. Cambridge University Press.
- ↑ Hitchcock, Susan Tyler (2007). Frankenstein: a cultural history. New York City: W. W. Norton.
- ↑ Gygax, Gary (1976). Grewhawk. TSR Rules. p. 35. LICHES: These skeletal monsters are of magical origin, each Lich formerly being a very powerful Magic-User or Magic-User/Cleric in life, and are now alive only by means of great spells and will because of being in some way disturbed.
- ↑ Lam, Stephanie (2009). "Hop on Pop: Jiangshi Films in a Transnational Context". CineAction (78): 46–51.
- ↑ Stokes, Lisa Odham (2007). Historical Dictionary of Hong Kong Cinema. Rowman & Littlefield.
- ↑ Will-o'-the-wisp. mythology.net.
- ↑ Briggs, Katharine (1976). An Encyclopedia of Fairies. Pantheon Books. pp. 14-16.
- ↑ Croker, Thomas Croften (1834). Fairy legends and traditions of the south of Ireland. pp. 209-286.
- ↑ Ammann, Keith (2019). The Monsters Know What They're Doing. Saga Press. pp. 272-275.
