3D 投影

3D 投影（粵拼：saam1 di1 tau4 jing2；英文：3D projection）係指將 3D 空間入面嘅點對應落去一塊 2D 平面嗰度嘅過程。

基本

睇埋：幾何學、3D 空間同平面

平行投影

内文：平行投影

平行投影（parallel projection）係泛指

「

由件 3D 物體嗰度，射一拃彼此之間成平行嘅射線出嚟，再擺一塊平面响空間裏面，塊平面上形成嘅影像，就係最後出嗰幅影像。

」

好似下圖噉，下圖藍色中空嘅框係件 3D 物體，由個框度射出嚟嗰啲箭咀係射線，條藍色直線係 2D 影像喺上面形成嘅平面。

透視投影

内文：透視投影

睇埋：消失點同地平線

透視投影（perspective projection）會諗埋景深感知嘅問題。

要用透視投影整圖像，首先要指定消失點（vanishing point）嘅數量同每粒消失點嘅位置：想像下面嗰幅相，幅相係喺 2014 年賓夕凡尼亞州一角影到嘅，相入面影到火車軌，兩條軌係平行嘅，而平行嘅線理應係永遠都唔會相交嘅，但由幅相度睇，望落彷彿好似兩條軌會喺其中一點相交噉－

「

喺 3D 空間度平行嘅線（由幅 2D 圖像睇）望落相交嘅點

」

正正就係所謂嘅消失點。消失點好影響到睇嘢嗰個人點樣判斷幅圖入面嘅 3D 空間，而事實係啲人將透視圖分類嗰時，就係用「消失點有幾多點」嚟分嘅，而且唔同消失點數量做到嘅效果都唔同。整圖像嘅人可以靠「睇嘢嘅人喺想像中嗰笪 3D 空間當中企邊度」嚟決定要揀邊種透視方法。

一點透視（one-point perspective）顧名思義係指幅圖得一粒消失點。

啲人實際整圖嗰陣，通常會由畫緊嘅物件射啲直線落消失點度，而如果件物件唔係好似建築物噉四四方方嘅，畫畫人可以（例如）喺件物件周圍畫個方柱形嘅框包住件物件，再由個框度射啲直線去消失點度。好似係下面幅圖噉，

• 黑線畫緊件物件；
• 紅線畫緊「由物件射去消失點嘅線」，而啲紅線相交嗰點就係消失點；
• 藍線畫嘅係地平線；

一般認為，會用一點透視，通常係想做到「睇嘢嗰個人企正喺件物件前面，由件物件正面望住件嘢」噉嘅效果。

• 一點透視嘅例子
• 
• 
• 

睇埋

• 3D 電腦圖像
• 電腦圖像詞彙