母語

母語mou5 jyu5（英文：first language，西班牙文：lengua materna，語言學上簡寫 L1），又叫第一語言，係BB仔嗰陣學嘅嗰種或者嗰幾種語言。母語嘅相對係第二語言。

定義

第一語言習得：2009 年呢幅相影到個 BB 聽佢太嫲講嘢；細路喺生命頭嗰幾年一路聽身邊啲大人講嘢，聽吓聽吓就會學識 L1。

母語係指一個人人生第一隻用嘅語言：齋靠經驗已經可知，一個蘇蝦仔喺生命頭嗰幾年一路聽住屋企人或者照顧者講嘢（有互動），慢慢就會牙牙學語學識講嘢，佢喺呢個時候學識講嗰隻語言就係佢嘅 L1 。

學習

有唔少語言學專家都想知第二語言習得（SLA）同第一語言習得（FLA）之間有乜分別。首先，FLA 通常主要係由屋企人（或者照顧者）做嘅－細路學 L1，通常唔使人特登教，照顧佢嘅人成日喺佢身邊用 L1 講嘢，個細路聽聽吓就會學識用 L1 講嘢；相比之下，學 L2 L3（第二語言等）就比較傾向會係正式啲噉做嘅，會由老師等嘅人員教細路用呢啲語言。

SLA 同 FLA 會有以下呢啲分別：

• 學 L1 正常嚟講唔會跟咩教學大綱；
• 屋企人同照顧者自己會用啱文法嘅字句，但好少可會明確噉解釋文法規則；
• 有人用廿一世紀初嘅英文做 FLA 研究，觀察家長點樣同學緊講嘢嘅細路講嘢，發現家長成日都唔改正細路嘅文法，淨係改正啲唔真確嘅內容－即係話家長同細路講嘢嗰時，重視嘅係信息唔係形式。用廣東話諗嘅話，想像有個阿嫲同個學緊講嘢嘅孫仔講嘢－

  孫仔：嗰嚿係士多啤梨。（一句完全文法正確嘅句子）

  阿嫲：唔係呀，嗰嚿係蘋果。（改正唔真確嘅內容）

  孫仔：嗰係蘋果。（一句錯文法嘅句子）

  阿嫲：啱喇，嗰嚿係蘋果。（唔改正個細路嘅文法）

• 屋企人同照顧者會講啲細路能夠感知到嘅內容；

... 呀噉。

睇埋

• 第二語言
• 國際母語日
• 母語教學
• 第三文化兒童
• 以人口排列嘅語言一覽