粉筆少女

粉筆少女（2000年—）係對香港一位無公開真名嘅女仔嘅稱呼，因為2014年12月23號凌晨聲援雨遮運動喺金鐘佔領區「連儂牆」用粉筆畫花，畀警方拘捕而出名。

簡歷

粉筆少女本身住天水圍。2014年佢一路參與雨遮運動，清場後仍然到金鐘佔領區聲援。12月23號凌晨佢用粉筆喺牆上畫，結果引嚟14名重案組警員用「涉嫌干犯刑事毀壞罪」拘捕。12月28號，警方用個女仔阿爸無力照顧做理由，向法庭申請兒童保護令，接管個女仔，最後個女仔被判入女童院三星期。而外牆亦畀警方用膠帶封鎖，同埋派員通宵看住約莫13個鐘。

消息傳出後，事件引起激烈爭議。學民思潮召集人黃之鋒質疑警方做法。而律師認為用粉筆喺公共地方塗鴉唔算造成毀壞，只可以告佢行為不檢。而佢個粉筆花圖案同相關報道喺facebook「洗版」。學民思潮搞咗個聲援少女聯署，有5.5萬人參加。到2015年1月4號，有超過100名市民響應團體號召，到金鐘連儂牆聲援粉筆少女，人民力量譚得志、「女長毛」雷玉蓮同埋文化監暴成員藝人何韻詩亦有到場支持。

有文章喺網上流傳，指香港罪犯兼易服癖人士練家俊曾經出賣粉筆少女私隱，利用粉筆少女對佢嘅信任，將粉筆少女嘅照片放上親中派愛港之聲嘅討論區，結果令粉筆少女被好多親中派人士跟蹤同騷擾。

出女童院後，粉筆少女曾聲援捍衛沙田、遊覽完上水去屯門，同埋鳩嗚團活動。