納爾遜

納爾遜 或奶路臣（賀理修 奶路臣子爵，Horatio Nelson，1758年9月29號—1805年10月21號），18世紀後半葉至19世紀初英國海軍白旗中將。

納爾遜
姓名原文	Horatio Nelson
出生日	1758年9月29號
出生地	Burnham Thorpe
死亡日	1805年10月21號  （47歲）
死亡地	Cape Trafalgar
死因	Battle of Trafalgar
國籍	大不列顛愛爾蘭聯合王國
識嘅語言	英文
母校	Norwich School、Paston College
職業	海軍軍官、政治人
配偶	Frances Herbert Woolward
仔女	Horatia Nelson
阿爸	Edmund Nelson
阿媽	Catherine Suckling
兄弟姊妹	Susannah Nelson、William Nelson, 1st Earl Nelson、Suckling Nelson、Maurice Nelson
[改維基數據]

  「奶路臣」跳轉到呢度。想搵紐西蘭城市，請睇「奶路臣 (紐西蘭)」。

生平

早年

奶路臣喺1758年9月29號響英格蘭諾福克出世，喺十一個兄妹之中排第六。佢喺9歲時，畀佢喺海軍做艦長嘅舅父收養。

從軍

1770年，佢12歲嗰年，以海軍軍校學生身分加入咗英國皇家海軍，重到咗佢舅父沙克林做艦長嘅軍艦上做實習生。佢隨艦一齊遠航，學到好多船舶駕駛同海上生活嘅的經驗。沙克林利用佢嘅影響力令納爾遜可以加入軍艦Carcass號，隨船到北極探險，令年僅14歲嘅納爾遜獲得咗喺冰海航行嘅經驗。沙克林後來升任皇家海軍審計官，喺佢提拔下奶路臣響海軍平步青雲。奶路臣勤奮好學，佢好快掌握咗好多海上技能。1777年，19歲嘅奶路臣已經係一名經驗豐富而又能幹嘅年輕中尉。1778年，沙克林死咗。第二年，納爾遜被任命做Hinchingbroke號艦長。之後，胡德海軍上將任命納爾遜做Alemarle號艦長。

海戰

1797年2月14號，當時英國地中海艦隊喺大西洋聖文森特角遇上西班牙艦隊，雙方展開一場激烈海戰。呢次戰鬥中，納爾遜作為地中海艦隊中其中一艦艦長，違抗當時司令傑維斯爵士嘅命令，果斷咁隻身脫離隊形衝向西班牙艦隊，攔住敵人去路，重率艦勇敢逼近敵艦，兩次率兵衝上敵艦同敵人展開肉搏。納爾遜嘅行動為英國艦隊取得最後勝利起咗決定性作用。呢場聖文森特角海戰令佢一戰成名。戰後，納爾遜被晉陞為海軍少將，獲賜封勳爵，而納爾遜嘅名聲，亦喺歐州軍事界中冒起。

奶路臣英勇無畏，能征善戰，每次作戰都身先士卒，命令旗艦率先攻入敵陣，而且為咗激勵將士士氣，經常喺甲板上直接指揮作戰，但係亦因為咁而多次受重傷。1794年8月，納爾遜正忙於執行封鎖和圍攻土倫嘅任務。喺圍攻科西嘉Calvi時，一發炮彈打到佢面前，飛嚟嘅彈片同碎石打盲咗佢隻右眼。1797年7月，奶路臣喺進攻西屬加那利群島嘅特拉里夫島時，因右胕中彈而冇咗成隻右臂。兩次身受大傷而殘疾後，奶路臣就畀人叫做「殘疾將軍」。

其他海戰：

• 1798年8月：率領英國分艦隊喺阿布基爾海戰中大勝法國艦隊，因而畀英王封為男爵；
• 1799年：被派往那不勒斯，喺當地因殘酷迫害法國戰俘同意大利共和政體支持者而聲譽受損；
• 1801年：喺波羅的海同哥本哈根作戰時，出任帕克上將所率領嘅分艦隊任副司令，無耐重做咗英吉利海峽分艦隊司令；
• 1803年至1805年：出任地中海分艦隊司令；

1803年5月，納爾遜出任地中海艦隊司令，以對抗法西聯合艦隊。1805年10月19號，法西聯合艦隊駛離西班牙加的斯港，企圖通過直布羅陀海峽前往地中海，配合拿破侖喺意大利嘅軍事行動。呢個時候，奶路臣已經喺加的斯以西嘅特拉法爾加海域等候。10月21號朝早，19世紀規模最大嘅一場海戰（亦是納爾遜人生最後一戰）－特拉法加海戰正式開打。

特拉法加戰役

納爾遜最出名嘅旗號，「英倫預咗每個人都會做到佢嘅職責」，喺皇家海軍軍艦勝利號上飄揚

喺特拉法加戰役開始前一日，一個舵手因忙於綑紮郵帶，唔記得寄家書，而郵船已揚帆遠去，佢知道後立即下令將郵船召回，佢話：「邊個保證佢聽日唔會陣亡，佢嘅家書應該同其他人嘅信同時寄出。」呢位舵手極為感激，所有官兵無不對將軍表達熱情嘅崇敬。呢件小事足以說明納爾遜有仁者之風。

當時，法西聯合艦隊有戰艦33艘，英國艦隊有戰艦27艘。戰鬥喺下晝4點左右結束，英國艦隊獲勝，法西聯合艦隊33艘戰艦中，8艘被擊沉，12艘被俘，人員死傷同被俘達7000幾人。英國戰艦無一損失，僅傷亡1600幾人。但喺戰鬥中，納爾遜畀法艦「敬畏」號上嘅狙擊手擊中身亡，年僅47歲。

奶路臣運用佢獨創嘅方法，即係用一啲唔同色水同圖形嘅信號旗溝通艦隊之間嘅聯繫。現代海上通用嘅國際信號旗（亦稱「萬國旗」）即由此演變而來，成為咗戰勝法國艦隊嘅重要因素。海戰前夕，佢嘅旗號係「英倫預咗（期望）每個人都會做到佢嘅職責」（England expects that every man will do his duty），已成為英國人日常生活中所熟悉同慣用嘅習語。

呢次海戰勝利嘅重要意義不單在於重創法西聯合艦隊，而且粉碎咗拿破崙佔領英國嘅企圖，結束咗長期以來英法爭奪海上霸權嘅鬥爭，確立咗英國海上霸主嘅地位。正如後人所說：「一個特拉法加，一個莫斯科，將不可一世嘅拿破崙趕落台。」佢陣亡以後，英國喺倫敦聖保羅大教堂為佢舉行隆重嘅葬禮，遺體安葬喺大教堂嘅墓穴中。

遺言

根據皇家海軍軍艦勝利號嘅外科醫生William Beatty講，奶路臣嘅遺言係「多謝神，我做到咗我嘅職責。」佢話奶路臣彌留時反反覆覆咁講咗哩句話好多次。

韜略

戰略

奶路臣嘅軍事思想係「以海制陸」嘅海權思想，戰略係「艦隊殲滅主義」，以消滅艦隊為目標，再以海制陸，令拿破崙嘅路上霸權瓦解。

戰術

帆船時代嘅正規戰法係縱隊接敵，採平行作戰，易使敵人逃避，無法殲滅。

納爾遜對帆船戰法並唔墨守成規。佢創立「奶路臣戰法」，主要著眼點係，畀下屬隨機獨斷嘅權力，並以迫敵決戰，殲滅敵人為作戰目標。奶路臣戰法能把握戰機，主動奇襲迫敵決戰，令敵人顧得前唔顧得後，而達成殲滅戰果。以特拉法加一役為例；奶路臣戰法以少勝多，擊沉敵艦廿二艘，成就之大堪稱空前。

地標

響英國同其他地方有多處紀念奶路臣嘅紀念碑，包括倫敦中心特拉法加廣場嘅奶路臣紀念柱。英倫三島以外，紐西蘭嘅奶路臣市，同埋加拿大英屬哥倫比亞嘅奶路臣島，都係用奶路臣嚟命名。

後裔

奶路臣冇合法嘅子嗣，只有一個同佢情婦愛瑪．咸美頓生嘅私生女—Horatia。佢死後嘅爵位同封邑一度無人繼承，後來先至由佢兄弟威廉承繼。

文藝創作

奶路臣嘅生平往事俾好多個作家，包括Susan Sontag、Amber Benson、Christopher Golden、Barry Unsworth、Dudley Pope、Bernald Cornwell同埋James A Michener，攞嚟做佢哋嘅創作背景。

另外，唔少電影亦將奶路臣嘅故事寫成電影劇本嚟拍攝電影，其中最出名嘅係由羅蘭士．奧利花同慧雲李喺1941年主演《忠魂鵑血》。呢齣戲係已故英國首相邱吉爾最鍾意睇嘅電影，傳聞佢一共睇咗17次。

參考

• 真正的海軍中將．納爾遜––拿破崙的海上最大敵人