老爺嶺

  想搵第二個意思嘅話，請睇老爺嶺 (搞清楚)。

老爺嶺
海拔	1284.7米
位置	中國吉林省吉林市

老爺嶺（粵拼：lou5 je4 ling5*leng5）係位於中國吉林東部嘅山脈，喺吉林市，係蛟河同永吉、舒蘭嘅界。佢亦有部分伸入黑龍江嘅東南部，係長白山嘅支脈。老爺嶺嘅走向係西南—東北走向，西面去到鏡泊湖—牡丹江流域，東面去到穆棱河谷。長度約200公里，闊約30公里，總面積約3.26萬平方公里，海拔約喺600到1000米之間，山體主要由新生代嘅玄武岩構成，最高1284.7米。

老爺嶺嘅黑龍江部分開闢咗自然保護區，叫做老爺嶺東北虎國家級自然保護區，呢度生活住東北虎，係國家保護動物，野生東北虎都幾珍稀，所以劃做保護區來畀佢哋棲息。近年來啲監測顯示，老爺嶺嘅野生東北虎開始活躍，所以政府打算將老爺嶺劃入「東北虎豹國家公園」嘅建設計劃。老爺嶺森林豐富，呢度開設有林場來開採林木資源，另外亦有礦產，有煤同金。而喺吉林蛟河市境內，就喺1990年開闢咗老爺嶺風景區畀人觀光。

名

老爺嶺嘅名有兩種講法：

• 係滿文地名，漢文寫音叫「拉顏」（滿文：ᠯᠠᠶᠠᠨ，穆麟德：layan；普通話拼音：Lāyán），「老爺」（普通話拼音：Lǎoyé）係佢嘅官話轉音。滿文名嘅意思係「枯山」。
• 有個道士喺半山起咗間關帝廟，啲人嗌間廟叫老爺廟，座山嶺因廟而得名。

老爺嶺嘅山名係清康熙二十八年（1689年）定名嘅。

位置

老爺嶺喺吉林嘅東部，西面係吉林盆地、舒蘭盆地，東面係蛟河盆地，係拉法河同第二松花江右側支流嘅分水嶺。佢向東北延伸，喺蛟河盆地北面接住張廣才嶺，南面嘅延伸過咗松花湖，會到吉林哈達嶺。老爺嶺係長白山系嘅一部分，夾埋啲餘脈，長度好長，可以從牡丹江上游去到完達山，所以係牡丹江同穆棱河呢兩支水系嘅分水嶺。

地貌

山地高程大抵係中高，啲山頂偏圓鈍，海拔喺六百到一千米之間，相對高度600米以上，北部嘅山勢低緩啲。主要山峯有老爺嶺峰、康大砬子、楊木大頂子，佢哋嘅海拔都喺一公里以上。山地南部係松花湖地區，比較高大，樹亦好密。成個山勢就係南高北低。

因爲老爺嶺周圍有水流，係個分水嶺，所以啲峽谷畀水系切割，形成深峻嘅河谷。老爺嶺山體岩石主要係玄武岩，喺新生代時因爲岩漿噴發而形成，噉係由於地質上造山運動令地質活動活躍，火山活動強烈，呢個同成個長白山系嘅形成有關。之後因爲當地降水豐富，流水侵蝕，形成各類河谷地、盆地。

地質

老爺嶺嘅西面係伊舒地塹，東面係蛟河盆地（斷陷盆地），受北、東北向嘅斷裂帶控制。佢係斷塊山地，華力西期同燕山期花崗岩係佢嘅主體。局部山體由二疊系變質岩、侏羅系火山岩組成，喺新構造運動中明顯上升。

氣候

老爺嶺山區年均溫喺2.3℃～3.5℃，無霜期126日～138日，凍啲山區無霜期100日左右；年均降水量530毫米。