鏡泊湖
43°48′55″N 128°53′15.7″E / 43.81528°N 128.887694°E
| 鏡泊湖 | |
|---|---|
 | |
|
| |
| 流入 | 牡丹江 |
| 流出 | 牡丹江 |
| 位置 | 中國黑龍江省寧安 |
| 成因 | 堰塞湖 |
| 湖長 | 45 km[1] |
| 湖闊 | 300 m ~ 6 km[1] |
| 面積 | 79.3 km²[1] |
| 均深 | 40 m[1] |
| 最深 | 70 m[2] |
| 水體積 | 16億 m³[2] |
| 海拔 | 353 m[3] |
| 城鎮 | 渤海鎮 |
鏡泊湖（粵拼：geng3 bok6 wu4）係位於中國黑龍江省寧安市嘅天然湖，地處完達山區，離中國同朝鮮嘅國界幾近，隔咗個延邊州。鏡泊湖係堰塞湖，係由於4800年前火山爆發嘅影響，啲熔岩塞住咗牡丹江上游河道，於是積水成湖噉形成[2]。
鏡泊湖好大，形狀細長，南北長45公里，東西最闊6公里，最窄300米，一般闊500~1000米，湖水面積79.3平方公里，平均水深40米，個湖北深南淺，最淺得1米[1]，湖北部有最深水位達70米，儲水量約16億立方米[2][3]。呢個湖係高山堰塞湖，海拔353米[3]，因爲多山，湖岸綫好曲折，號稱「百里長湖」。憑住接近80 km²嘅湖面，鏡泊湖係中國最大嘅堰塞湖，亦係世界第二大嘅高山堰塞湖[3][4]。
名
編輯
「鏡泊湖」嘅名出自《明誌》，意思係話佢水平如鏡，《吉林省分圖》透過官話諧音，寫成鏡波湖（geng3 bo1 wu4；普通話拼音：Jìngbō Hú，「鏡泊湖」拼音：Jìngbó Hú）[5]。
喺之前，個湖曾有過幾個唔同嘅名。《新唐書》叫湄沱湖（mei4 to4 wu4），清代時叫畢爾騰湖（bat1 ji5 tang4 wu4；滿文：ᠪᡳᠯᡨᡝᠨ，穆麟德：Bilten，義「水澤、水淀」[6]；普通話拼音：Bì'ěrténg Hú）[註 1][5]。有攷據認爲，根據「湄沱」嘅中古漢音，有可能係轉音自古代滿洲話[註 2]，呢個詞嘅現代滿文係ᠮᡝᡳᡨᡝ（穆麟德：meite），意思係「截」[5]。換言之，「湄沱湖」嘅意思可能係「截住嘅湖」，啱好鏡泊湖又真係熔岩堰塞湖。而又考證，滿文嘅「Bilten」可能亦係轉自「meite」，首先「b」同「m」有轉換關係，即係「b」塞化自「m」；然後經過緩讀增音，加咗音素；接住作爲當地一大自然地標，bilten諧成水體通名，有咗「水澤」嘅意思[5]。
因爲鏡泊湖係牡丹江嘅組成部份，所以有時江名亦係湖名。比如鏡泊湖又叫過湄沱河、忽汗海（fat1 hon6 hoi2）。其中「忽汗海」嘅「海」可能係「河」嘅漢文古音嘅再轉，將佢指稱去「鏡泊湖」可能係按照現代語言理解嘅結果[5]。
史
編輯鏡泊湖地區西北部有火山群，一百萬年前開始不斷噴發，以致形成百餘里長嘅玄武岩臺地。火山最後一次噴發係4800年前，呢次嘅熔岩塞住牡丹江河道，於是形成鏡泊湖，之外重形成小北湖、鑽心湖、鴛鴦池等一系列大大細細嘅堰塞湖[2]。
鏡泊湖地處中國東北，長期係各個漁獵民族嘅領地。渤海國時期，遷都到呢度一帶，設置嘅五京十五府六十二州當中，呢度屬上京龍泉府嘅湖州。渤海亡國後，屬過遼國、金國、元、明、清等。
滿洲國成立、日本勢力佔據當地後，鏡泊湖一帶多咗好多日本人，佢哋係日本派去滿洲嘅漁農開拓團，入殖鏡泊湖嘅叫秋田漁業開拓團，喺康德六年（1939年）入殖，呢個日本開拓團來自秋田縣[9]。佢哋喺當地調查研究，開發森林、發掘古蹟[10]，起咗總容量3.6萬千瓦嘅水電廠，供電畀牡丹江、延吉[11]。1940年代到1950年代間，有俄羅斯正教會古儀式派嘅信徒（白俄人）喺鏡泊湖一帶度住，佢哋屬無僧派之中嘅禮拜堂派，後來中國政府驅逐東北嘅俄羅斯人，於是啲俄人遺蹟慢慢冇晒[12][註 3]。
景區
編輯鏡泊湖而家開闢成國家級景區，成個景區由三部份組成：百里長湖、火山口原始森林、渤海國上京龍泉府遺址，總規劃面積達1726平方公里[2]。喺1982年，國務院評定鏡泊湖做首批國家重點風景名勝區；2006年，世界教科文組織評佢做世界地質公園，作爲地質公園嘅面積有1400平方公里；2008年，國際休閒產業協會、聯合國國際生態安全合作組織、中國國際名牌協會一齊評佢爲中國十佳休閒旅遊勝地之一；2010年，鏡泊湖評選爲中國國家5A級景區[2]。
鏡泊湖景區嘅旅遊資源有72處，包括48處自然景觀，佔67%，24處人文景觀，佔33%。鏡泊湖作爲百里長湖，喺群山之中彎彎曲曲，又水平如鏡，山水相應，景色怡人。有諸如白石砬子、城牆砬子、老鴰砬子、珍珠門、毛公山、大孤山、小孤山、道士山等等景點[2]。其中北面湖水流出嘅地方有吊水樓瀑布，落差20米，豐水期時三面都有水，長一百米，水流量達每秒4000立方米[2]。吊水樓瀑布係中國緯度最高嘅大瀑布，因爲景色壯麗，列爲鏡泊湖第一景點[1]。
鏡泊湖除咗風景好，夏天時亦係避暑去處，當地5月~9月期間平均温度10℃~20℃，因爲有山水森林，空氣亦清新；成個景區除咗有湖光山色，亦因爲火山地貌兼具火山口地下原始森林、熔岩隧道[2]。其中當地嘅大型熔岩隧道喺中國比較罕見，係中國目前發現規模最大、最完整嘅熔岩隧道[2]。條熔岩隧道位於地下森林東南13公里處，據科學家推測，係四千到八千年前嘅火山噴發形成嘅，個樣好似桂林嘅石灰岩溶洞（喀斯特地貌），不過成因同溶洞唔同，係啲熔岩流晒後形成嘅空洞。探測過嘅隧道當中，最短幾十米，長嘅有500米以上，一般闊5米、高3米[1]。
景區裡面嘅渤海鎮係渤海國京師，喺775年遷都來呢度，叫做上京龍泉府，係五京之首。當時個京城分三部份，仿照唐長安城建造：宮城、內城、外城。後來契丹亡佢國時，毀滅咗都城，但留低咗城基、殘垣、琉璃井。渤海京城遺址列咗做國家級重點文物，係中國保存得最好嘅中世紀都城遺址[1]，好有科考、人文景觀價值[10][1]。
生物
編輯鏡泊湖嘅雜魚有72種咁多，比如有鯉魚、紅尾、鰲花、重唇魚、大白魚。鏡泊湖出產嘅鯽魚雖然細條，但啲肉鮮甜，清代時係皇家貢品。另外湖度重出產一種叫黃瓜香嘅魚，呢種魚本身有青瓜香味[13]。除咗魚，鏡泊湖度重有淡水珊瑚[4]。
除咗魚類，景區內重有60種獸類、27種鳥類、15種爬行類、11種兩棲類，有諸如東北虎、金錢豹、黑熊、鹿等動物。其中有種特別嘅羊叫懸羊，呢種羊瞓覺時可以用角將自己掛喺樹度、懸崖度，所以叫懸羊[13]。
植物方面，鏡泊湖地區嘅植被保存得幾好，覆蓋率達九成以上，當地屬温帶闊葉混交林，主要有紅松林、紅松闊葉混交林、落葉闊葉林。主要樹種有蒙古櫪、槭、椴、水曲柳、楡、樺、五味子、山葡萄、狗棗、獼猴桃、遼東冷杉、杜松。景區西部嘅小北湖林場有大面積原始森林，火山口附近有大面積落葉松[2]。
註
編輯- ↑ 「畢爾騰湖」出自《欽定盛京通志》、《吉林通志》，《水道提綱》寫成必爾滕湖（bit1 ji5 tang4 wu4；普通話拼音：Bì'ěrténg Hú），《吉林外紀》寫成必爾特恩（bit1 ji5 dak6 jan1；普通話拼音：Bì'ěrtè'ēn），都係同一滿文嘅唔同官話轉寫[5]。
- ↑ 「湄」字武悲切，明母脂韻平聲；「沱」字徒河切，又徒可切，定母歌韻，有平、上二聲。「湄沱」呢個詞，王力擬音[mi dɑ]，高本漢擬音[mji dʰɑ]，董同龢擬音[mjĕi dʰɑ]，周法高擬音[miei dɑ]，李方桂擬音[mji dâ][7]。
- ↑ 呢批白俄人住嘅村，根據日文資料，叫做チンバフ村（Chinbafu村，中文、俄文名未知），呢條村喺牡丹江市南面、鏡泊湖一帶，不過確切位置唔知。呢條村嘅白俄人移民自細鱗河村（普通話拼音：Xìlínhé；俄文：Силинхэ，拉丁化：Silinkhe；日文：シリンヘ，拉丁轉寫：Shirinhe），佢哋嘅宗教教導者叫查善·尼抗·伊格那切域池（Чашин Никон Игнатьевич，拉丁化：Chashin Nikon Ignat'yevich）。佢哋係走難來中國嘅俄國人，一度喺黑龍江開枝散葉，但日後中國局勢好唔穩定，諸如滿洲國、蘇聯軍攻佔、國共內戰、中蘇交惡等，而家散到七七八，啲遺蹟都好少見[12]。
攷
編輯- ↑ 1.0 1.1 1.2 1.3 1.4 1.5 1.6 1.7 1.8 〈鏡泊湖〉。華夏經緯網。2003年7月19號。原著喺2012年5月8號歸檔。喺2015年10月19號搵到。
- ↑ 2.00 2.01 2.02 2.03 2.04 2.05 2.06 2.07 2.08 2.09 2.10 2.11 〈鏡泊湖簡介〉。鏡泊湖管委會。原著喺2016年7月6號歸檔。喺2015年10月17號搵到。
- ↑ 3.0 3.1 3.2 3.3 "Jingpo Lake: More Than Natural Scenery" (英文). 中國網. 2006年11月24號. 喺2015年10月17號搵到.
- ↑ 4.0 4.1 〈Lake in China—Jingpo Lake 中國的湖—鏡泊湖〉。滬江漢語。2013年4月18號。原著喺2016年3月4號歸檔。喺2015年10月19號搵到。
- ↑ 5.0 5.1 5.2 5.3 5.4 5.5 王岸英 (2008)。〈牡丹江流域滿語地名之翻譯考證〉 (PDF)。《民族翻譯》。2008年第1期（總第68期）。原著 (PDF)喺2016年3月5號歸檔。喺2015年10月18號搵到。
- ↑ 編：栗林 均、呼日勒巴特爾。《『御製満珠蒙古漢字三合切音清文鑑』満州語配列対照語彙》 (PDF)。《《東北アジア研究センター叢書 第30号》》 (日文)。東北大學東北亞研究中心。
{{cite book}}: CS1 maint: url-status (link)呢份係上卷，下卷係呢個[失咗效嘅鏈]。 - ↑ 〈漢字古今音資料庫〉。臺灣大學中國文學系、中央研究院資訊科學研究所。原著喺2015年10月22號歸檔。喺2015年10月17號搵到。
- ↑ 《《徒歩旅行 : 体位向上》》。日本國際觀光局滿洲支部。1940年。頁 39。（日文）
- ↑ 〈日本移民侵華罪證專題檔案：滿洲漁農開拓團〉。黑龍江檔案信息網。2015年9月8號。喺2015年10月19號搵到。
{{cite web}}: CS1 maint: url-status (link) - ↑ 10.0 10.1 〈鏡泊湖人文與歷史〉。鏡泊湖管委會。原著喺2016年7月6號歸檔。喺2015年10月18號搵到。
- ↑ 〈牡丹江鏡泊湖發電廠的紅色記憶〉。《國家電網報》。英大網。2012年10月12號。原著喺2016年3月5號歸檔。喺2015年10月19號搵到。
- ↑ 12.0 12.1 阪本秀昭。〈旧満州シリンヘ村における正教古儀式派宗教会議について（譯：有關舊時滿洲細鱗河村嘅東正教古儀式派嘅宗教會議）〉 (PDF) (日文)。天理大學學報 第60卷第2號。喺2015年10月19號搵到。
- ↑ 13.0 13.1 〈自然生態〉。鏡泊湖管委會。原著喺2016年7月6號歸檔。喺2015年10月19號搵到。
睇埋
編輯
連出去
編輯- 鏡泊湖管委會 - 鏡泊湖景區官方網站