聖安多尼堂 (香港)
聖安多尼堂（英文：St. Anthony's Church）係香港一間天主教教堂，位於石塘咀薄扶林道，喺1953年6月13號建立，由白英奇主教為新堂祝聖，由天主教香港教區同慈幼會共同管理，同時係慈幼會嘅港島區聖堂。
歷任司鐸
編輯- 1929年至1932年：馬之驥司鐸（FR. GALDINUS BARDELLI）
- 1932年至1934年：韋助力司鐸（FR. THEODORE WIECZOREK）
- 1934年至1939年：楊春枕司鐸（FR. JOHN PEDRAZZINI）
- 1939年至1950年：韋助力司鐸（FR. THEODORE WIECZOREK）
- 1950年至1957年：葉慎修司鐸（FR. ANDREA GHILARDINI）
- 1957年至1964年：恩澤民司鐸（FR. PAUL JANSSEN）
- 1964年至1968年：查其威司鐸（FR. MARIO CALVI）
- 1968年至1977年：劉志剛司鐸（FR. FRANCIS LAU）
- 1977年至1986年：何廣凌司鐸（FR. PETER HO）
- 1986年至1991年：麥雪光司鐸（FR. LOUIS MAK）
- 1991年至1994年：鄭海康司鐸（FR. JOSEPH CHENG）
- 1994年至2012年：李海龍司鐸（FR. JOSEPH LEE）
- 2012年至2017年：黃建國司鐸（FR. FRANCIS WONG）
- 2017年至而家：梁熾才司鐸（FR. PEDRO LEONG）
歷史
編輯聖安多尼堂嘅前身係1864年米蘭會會士喺般含道（今日明愛凌月仙幼稚園所在地）建立嘅小堂聖心堂，奉聖安多尼聖師為主保。1875年，小堂由基督學校修士會接辦。1879年聖安多尼堂喺聖心小堂側邊建成（今日英皇書院所在地），小堂就關閉，由聖安多尼堂繼承。
1921年因為政府收地，就搬去第三街聖類斯工藝院，並交由瑪利諾會主持。1927年慈幼會會士抵達香港，接辦聖類斯工藝院。1933年慈幼會決定興建新教堂，並由當時恩理覺主教批准有正式主理婚配權。1947年當時嘅主任司鐸韋助力神父親自去美國勸捐，獲款10幾萬港元，加上「玫瑰會所」（即係今日「女聖體會」）同全堂區教友鼎力支持之下，先至能夠動工。
1952年6月8號聖安多尼堂喺今日嘅位置舉行奠基，由教區副主教戴迪遐齡神父主持祝聖基石儀式。1953年教堂趕得切喺主保安多尼瞻禮日（6月13號）完成，由教區主教白英奇主持祝聖後啟用。
1963年聖安多尼堂十週年紀念，由主任司鐸恩澤民神父籌辦嘅聖安多尼小學宣告啟用，並由白英奇主教祝聖開幕。1968年劉志剛神父成為首任華人司鐸。1970年創立「傳教協會」（即係「堂區議會」嘅前身），為當時教區中少數有健全善會聯繫制度嘅堂區之一。
1971年聖類斯學校喺年中移交一啲課室（即係「會議中心」現址），劉神父將課室改成各類會議室、圖書館、影音室等，並發展青年中心同堂區議會，令到統籌同協調堂區內嘅傳教同牧民工作更加能夠達到標準。1978年何廣凌神父接手處理籌備裝修大計，分兩期進行，期間進行大型籌款活動，並藉住建堂銀禧紀念，將教友同善會嘅圈子拉近，當年嘅堂區活動同善會人數亦係歷年之冠。1984年整體建設完成。
1993年堂區再進行裝修，分為三期進行，首先修建天頂同外牆，繼以喺堂慶之後進行聖堂內嘅修建，最後就係會議中心嘅改建。至於四十週年嘅各類活動亦順利展開，到達六月舉行四十週年堂慶感恩祭鳄聯歡晚宴。1994年聖安多尼堂第二期裝修完成。李海龍神父繼任為主任司鐸。上任後，李神父立即著手籌備第三期裝修。1996年慶祝聖安多尼冊封為教會聖師嘅金慶。得到附有證書嘅聖安多尼聖髑（聖人嘅皮膚），喺聖安多尼堂聖安多尼像前奉放。由教宗代表 Mgr. Filoni 祝聖嘅聖母進教嘅佑像，供日後聖母出遊用。1997年紀念聖安多尼堂奠基四十五週年。
地理位置
編輯聖堂位於第三街同山道之間嘅薄扶林道，聖堂嘅左邊側牆平行噉緊貼住馬路起，喺香港大學本部陸佑堂對面。六十年代由中環作起點嘅公共交通汽車嘅大學站路線，就喺聖堂門前做總站。
除咗聖安多尼堂之外，堂區更包括以下嘅彌撒中心：
建築風格
編輯
聖堂外貌
編輯聖堂面向馬路嘅大門同大閘到而家都冇用過，教友慣常出入嘅門口喺聖安多尼學校度。聖堂入口放咗慈幼會會祖聖鮑思高（John Bosco，1813-1888）嘅塑像，佢親切噉將左手搭喺聖多明我沙維豪（Dominic Savio，1842-1857）膊頭上，佢哋都係慈幼會特別恭敬嘅聖人。聖堂外露天嘅一角設有露德聖母洞，種有花草，係繁喧市區中嘅一個令人重返大自然嘅角落。
聖堂內貌
編輯進入聖堂之後，可以見到聖堂內部冇支柱，寛濶嘅空間，好似一個小型嘅天空。由縱橫線條裝飾嘅平頂，令人感覺好似喺一架大蓬車裏面。聖堂最前方嘅正祭台，背後係一個圓拱，兩邊有吹住喇叭嘅漆金天使塑像。
圓拱外嘅兩側，左邊係聖母進教嘅佑像，右邊係耶穌聖心像。祭台頂嘅圓拱中央，有一個浮雕徽號以拉丁文寫住博愛篤信（Fide et Caritate）。1960年代禮儀改革前，正祭台上方供奉嘅係聖安多尼塑像，而家呢個該塑像放喺聖堂右邊嘅側祭台上。喺側祭台上有一個特製嘅小型座檯圓形面鏡嘅聖髑顯供架，喺中央設有好似手掌咁大小嘅圓盒，逢星期二供奉聖安多尼嘅骸骨，其他日子就供奉聖人嘅皮膚。聖安多尼嘅聖髑很受信徒嘅敬重，鄛多人為咗尋找遺失咗嘅人同物，都特登過嚟要求佢代禱。教會內稱聖安多尼為「失物主保」。
