脱毛

脫毛（粵拼：tyut3mou4），又叫拔毛，係指將體毛連根拔起，效果比剃毛更持久，但係直接拔毛會刺激神經細胞，會有疼痛感覺。一般脫毛之後體毛會喺一至兩個星期重新生返出嚟。有啲美容中心會提供永久脫毛，蠟脫毛通常要做好幾次先有永久脫毛嘅效果。依家利用微創技術或者鐳射可以有效殺死毛囊，令佢唔會生長，達到永久脫毛效果。

女人同男人嘅體毛分佈

脫毛原因

脫毛有好多唔同原因，包括文化、美容、宗教等方面。喺已發展國家同其他大城市，脫毛已經成為一種流行文化，大家所使用嘅方法各有唔同，其中剃毛係最常用嘅方法。

文化方面

人類社會基於文化唔同會培養或者除去身體唔同地方嘅體毛，成為一種社會規範。呢啲唔同嘅審美標準適用係男性同女性。人體上嘅毛髮屬於一種文化審美標準，毛髮嘅存在會觸及社會文化接受性。例如，對大多數傳統社會嚟講，女士喺公眾場合應該只係露出頭髮、眼睫毛同眼眉毛，但係露出體毛會畀人覺得唔雅觀，又會帶嚟尷尬。喺中東地區，女性除走體毛一直公認為係一種良好衛生習慣，千百年嚟，官員都會頒行相關命令。

美容方面

未脱腋毛嘅女人

脱咗腋毛嘅女人

正所謂「女為悅己者容」，喺現今社會入面，好多女性覺得脫毛女性會令自己更加吸引同有活力，令到脫毛愈嚟愈普及。20世紀開始，好多女性鍾意着外露嘅衫褲，如果好多體毛會認為係唔靚，所以唔少女性會將毛剃走，例如腿、胳肋底下面同其他地方。其中，美國大多數女性會定期刮走腿部同腋下嘅毛，而大約一半仲會剃到比堅尼線。

喺傳統中國文化入面，華人社會係唔會脫體毛。孝經云：「身體髮膚，受之父母，不敢毀傷，孝之始也。」但係隨住社會逐漸西化，女性工作機會愈嚟愈多，為咗增加吸引力，女性脫毛喺華人社會已經變到好流行。香港方面，脫走雙腿同腋下面嘅體毛係最常見，亦係女性幫襯美容院嘅主要原因之一。

宗教原因

剃頭係佛教、基督教、回教、耆那教同印度教傳統嘅一部分。其中，佛教嘅僧侶更加需要做某種形式嘅剃頭或者剃度。

猶太教方面，男士有一個禁止用剃刀鬍鬚或者鬢角嘅講法。另外，喺直系家庭成員「走咗」之後，無論男女都要喺30日嘅哀悼期內削減佢哋嘅頭髮或者刮鬍鬚。

古埃及嘅祭司每日都要剃或者脫去所有毛髮，從而畀神一種「純粹嘅」身。

脫毛方法

常用嘅脫毛方法大概有兩種，分別係永久脫毛同暫時脫毛。

永久脫毛

永久脫毛方法技術日新月異，通常要喺美容院或者醫療場所（醫美診所及醫院醫學美容中心）操作。永久脫毛係以脫毛機產生超高頻振盪信號，形成靜電場，作用係破壞毛髮毛囊，令到毛髮脫走，唔會再生出新毛，達到永久脫毛嘅效果。好處係可以保持長久時間，唔使重複；缺點係會對皮膚有或多或少嘅損傷同刺激，隨住科技進步，呢方面嘅損傷愈嚟愈少。

暫時脫毛

暫時脫毛通常可以喺屋企操作，例如用脱毛機或者脱毛膏將毛整走。暫時將體毛脫走可以令到皮膚喺短時間光潔，但係新嘅體毛會好快生返出嚟。

男士脱毛

男士胸肌有毛同無毛嘅分別

隨住社會價值觀有所改變，男士脫毛亦變得愈嚟愈普及。當中，職業需要（例如游水選手脱毛可以減低游水時嘅阻力、部分明星尤其係韓國，脱毛可以靚啲同提升形象）、心理需求、方便性同埋衛生亦成為男士脫毛嘅主要原因。

澳洲最大嘅本地醫療美容預約機構Bookwell數據顯示，背脊同膊頭係最受男士歡迎嘅脫毛部位，當中後生男士比較鍾意將胸肌同肚皮嘅體毛剃走。喺美容行業發達嘅日本，男土面部脫毛比較普遍。當中，日本男性美容院TBC喺2017年為22萬人提供鬍鬚永久脫毛服務。

整體壞處

雖然脱毛可以令到皮膚光滑同提升美感，但係亦有機會對身體造成損害，常見情況包括皮膚發炎、輕度燒傷、損傷、留有疤痕、毛髮向內生長、顛簸同埋令到毛囊受感染。

另外，某啲脱毛方法唔係永久性，會導致醫療問題同永久性損壞，或者成本會好高。其中部分方法更加係處於試驗階段，仲未得到臨床實證。

睇埋

• 腋毛
• 體毛
• 鬍鬚
• 頭髮
• 脱毛機
• 脱毛膏
• 鬚刨