舊北區理民府

22°26′45″N 114°10′14″E / 22.445706°N 114.170622°E / 22.445706; 114.170622

舊北區理民府（Old District Office North），香港昔日官署，喺大埔運頭角里，今為歷史古蹟，租畀香港童軍總會做會所。英國向大清租借新界之後起，以便接手原本新安縣縣官事務，初時有如新界首府，及後分南約北約，官署就處理北約，南約官署遷去中環。之後再北約理民府，再分大埔元朗，官署做大埔理民府，直至一九八三年先搬走。

一九八八年到二〇〇〇年撥作環境保護署大埔區分處。二〇〇二年，成為香港童軍總會新界東地域總部，改名羅定邦童軍中心（Law Ting Pong Scout Centre）。

一九八一年十一月十三號，評為香港法定古蹟。舊北區理民府係錯名，應叫做舊北約理民府。

史

一八九八年六月九號，英國駐華公使竇納樂爵士（Claude MacDonald，1852-1915），同大清李鴻章，北京簽署《展拓香港界址專條》。同年七月一號，新安縣深圳河以南，沙頭角河以南一大片地，連同大嶼山等離島，以及大鵬灣水域，租借畀英國，為期九十九年。一八九九年四月十七號，香港政府運頭角山上，行升旗禮，正式接收新界租地。座山英人叫旗桿山（Flagstaff Hill），亦稱圓岡（Contour）。

官署初期，治理新界中心，一九〇一年設田土司署（Land Office），後來叫大埔田土司署）。一九〇五年，為咗方便執行土地法例，將「District Land Office」分為兩個部門，其中之一係「Northern District」（北約理民府），座落喺大埔，管治新租地除咗新九龍同三個小島外嘅大部分地區。理民府嘅工作包括收稅、發牌、土地丈量、地區工程、司法仲裁、地方治安、排解糾紛、探測民情等。之後北約理民府分拆為大埔理民府同元朗理民府。

官署一九〇七年起，辦理新界北部，即荃灣以北嘅行政同土地註冊。同時附設郵局，直到重光，兼裁判司法庭，直到一九六一年。一九八三年先停用。

特色

理民府高踞山丘，原分南北，兩座單層，為咗適應天氣潮濕炎熱，東西立面都起咗寬敞嘅磚柱游廊同拱形門窗，整座用紅磚砌成，係廿世紀初典型殖民地建築物。二次大戰之後喺中間加建咗連結兩座，並喺北座加起多一層，整體上保持一貫古樸嘅外觀。喺裏面曾經放置咗砲仔一支，搬咗只剩砲架。

童軍中心同參觀

古蹟由香港童軍總會新界東地域租用。年中開放幾日畀市民參觀，平日朝早市民晨運，大家互不打擾。童軍總會為免影響運作，有保安措施，公眾人士只可以喺建築物圍欄外面影相同觀賞，倘若學校同非牟利團體對舊北區理民府有興趣，可去信童軍總會申請參觀，二〇一七年，總會每週平均安排一間學校參觀，至於市民，亦可以個人名義申請，批唔批就由總會決定。