裴楷

裴楷（粵拼：pui4 kaai2；237年—291年），字叔則（suk1 zak1），河東聞喜人（而家山西聞喜），係晉朝嘅官員、將領、名士。佢阿爺係裴茂，係漢朝嘅尚書令；老豆係裴徽，三國時曹魏嘅冀州刺史，係佢老豆嘅三仔；佢嘅伯爺係裴潛，有堂兄裴秀，堂侄裴頠。

裴楷
晉朝 官員、將領、名士
勢力	曹魏→晉朝
生	237年
死	291年
活躍時期	255年～291年
繼任	裴輿（臨海侯）
仔女	裴輿 裴瓚 裴憲 裴禮 裴遜 裴氏（女）
遞啲名
字	叔則
諡號	元
其他名	裴令公

佢同老豆裴徽、二哥裴康、細佬裴綽、二仔裴瓚、細侄裴遐、堂侄裴頠、堂細佬裴邈合稱爲「八裴」，啲人將佢同「八王」中嘅王夷甫相比。當時人讚佢係「玉人」。

生平

裴楷嘅老豆裴徽係有名嘅玄學家，同當時嘅學者交往密切。裴徽有四個仔，個個都成器，除咗大哥裴黎做將軍，其餘三兄弟都係做官，兼且都係名士，當中裴楷嘅才望最高。佢細個時就已經出名，受老豆影響，尤其精通《道德經》、《易經》，當時同王戎齊名。裴楷風神高邁，容儀俊爽，博覽羣書，對義理特別精通，時人稱呼佢做「玉人」，即係話佢嘅容貌舉止英俊出衆，就算頭髮亂、衫褲粗陋，個人都仲係好睇；又話「見裴楷就好似行埋座玉山，可以映照人樣。」（見裴叔則如近玉山，映照人也）。

於是鍾會向當時嘅大將軍司馬昭舉薦佢，話「裴楷清通，王戎簡要」，於是司馬昭闢拜佢做掾屬，之後遷任尚書郎，於是裴楷開始咗佢嘅仕途。謝鯤讚裴楷話佢「雋朗有識具，當時獨步」。到賈充改訂律令時，裴楷做當中嘅定科郎。做完件事後，曹魏皇帝召裴楷御前執讀，議論當中內容。裴楷嘅表現令衆人矚目。司馬炎做撫軍時，裴楷做參軍事。吏部郎缺時，司馬昭搵鍾會舉薦人，於是鍾會又舉薦佢上去。

晉朝初年，佢做中書郎，喺宮中出入，見到佢嘅人都幾尊敬佢。司馬炎登基後，想問卜睇下晉朝有幾代皇帝，卜出嘅結果話係「一」，皇帝即時唔開心，群臣亦驚慌，無人夠膽出聲。裴楷出來，以玄學上嘅「一」來講解占卜結果，令朝廷氣氛緩和返。於是佢轉做散騎侍郎，之後遷任散騎常侍、河內太守，然後入朝做屯騎校尉、右軍將軍，之後轉侍中。

石崇以佢自己係功臣嘅仔、有才氣，兼且同裴楷志趣唔同，而唔同裴楷交往。長水校尉孫季舒同石崇宴飲時因爲傲慢過度，石崇想上表免佢官，裴楷聽聞後，同石崇講「足下飲人狂藥，責人正禮，不亦乖乎！」來勸阻咗佢。

裴楷生性寬厚，生活唔知慳識儉，對奇珍異玩好有興趣，不過亦樂善好施。曾經因爲自己堂兄裴衍鍾意自己某間屋就送咗畀佢；梁王司馬肜、趙王司馬倫作爲皇族幾有錢，裴楷就請佢哋每年出幾百萬來接濟窮人，啲人笑佢疏財，佢答話：「令有餘嘅破費，來補足窮缺，呢個係天理。」（損有餘以補不足，天之道也）。佢嘅品德喺當時同山濤、和嶠齊名。晉朝皇帝曾經問裴楷當政得失，裴楷指出唯一嘅失係賈充之流嘅人喺朝廷，由於任愷、庾純亦指責賈充，於是皇帝調賈充出外，直到賈充嘅女嫁畀太子先整停件事。晉朝統一各地後，要公卿論政，裴楷就論述漢魏盛衰嘅軌跡，在座嘅人都歎服。

晉惠帝登基後，外戚楊駿執政。裴楷嘅仔裴瓚娶楊駿個女，但裴楷睇唔起楊駿，同呢個親家關係唔好。於是楊駿執政後，裴楷轉做衛尉，之後遷任太子少師，呢啲係閒職，無乜事做。到誅殺楊駿時，裴楷受牽連入獄，當時件事好倉促，啲人好驚，但裴楷好鎮靜，喺獄中攞紙筆寫信畀親屬。因爲傅祗救佢，於是出獄。太保衛瓘、太宰司馬亮話裴楷正直，抵賜爵，於是裴楷封爲臨海侯，食邑兩千戶。之後仲代替楚王司馬瑋做北軍中侯，兼散騎常侍，於是司馬瑋怨衛瓘、司馬亮掛住推薦裴楷而排斥佢，裴楷知道後唔敢任職，轉爲尚書。

當時由於八王之亂，局勢動盪，裴楷擔憂局勢，想調出朝廷避下，原本係要去做安南將軍、假節、都督荊州諸軍事，但臨行時司馬瑋發動叛亂，殺咗衛瓘、司馬亮。司馬瑋覺得裴楷之前搶佢北軍中侯個位，又同衛瓘、司馬亮係老襯，所以落令追殺裴楷。聽聞事變，裴楷匿去外父王渾屋企，同司馬亮個細仔一夜換咗八次埞匿，先至避過難。誅殺司馬瑋後，裴楷做中書令、侍中，同張華、王戎一齊掌控朝政大權。

裴楷有病（渴利疾），唔想擔任咁高職位。於是王渾幫佢表奏，想調佢去做光祿勳，但上面唔聽，結果要裴楷做光祿大夫、開府儀同三司。到佢病到瞓床時，黃門郎王衍去探佢，裴楷望住佢話：「竟未相識」，王衍亦感嘆裴楷嘅神采。裴楷好識睇人，包括王衍在內，佢賞識過嘅樂廣、夏侯玄、鍾會、傅嘏、山濤都係一時名士，其中樂廣仲係畀裴楷舉薦先至從此出名。

之後，裴楷屋企煮飯，啲穀米煮出來唔係變成拳頭噉，就係變到似血噉，有時仲變成蕪菁籽噉。出咗呢啲離奇事後，裴楷當年就過身，時年虛歲五十五歲，諡號元。

日後顧愷之幫裴楷畫像時，喺佢面上畫多三條鬚，啲人問佢原因，佢話噉先畫得出佢嘅才識，睇畫嘅人先發覺呢三條鬚加得好。

評價

• 時人：見裴叔則如近玉山，映照人也
• 鍾會：裴楷清通，王戎簡要
• 武陔：戎尚約，楷清通。
• 王衍：「見裴令公精明朗然，籠蓋人上，非凡識也。若死而可作，當與之同歸」（有講法話係王戎講嘅）「雙眸閃閃，若巖下電，精神挺動」
• 王渾：楷性不競於物
• 《晉諸公贊》：楷特精易義
• 顧愷之：裴楷儁朗有識具
• 房玄齡：秀則聲蓋朋僚，稱為領袖。楷則機神幼發，目以清通。俱為晉氏名臣，良有以也。

家屬

• 阿爺：裴茂
• 老豆：裴徽，「八裴」之一。
• 叔伯及堂兄弟、堂侄
  • 裴潛
    • 裴秀
      • 裴頠，「八裴」之一。
  • 裴儁
    • 裴越
  • 裴輯
  • 裴綰
    • 又有堂細佬裴邈，「八裴」之一。
• 兄弟及侄
  • 大哥裴黎
  • 二哥裴康，「八裴」之一。
  • 細佬裴綽，「八裴」之一。
    • 裴遐，「八裴」之一。
• 老婆
  • 王渾嘅女
• 仔女同孫
  • 裴輿，字祖明，官至散騎侍郎，娶司馬亮女。
  • 裴瓚，字國寶，中書郎，娶楊駿女，誅殺楊駿時畀亂兵殺害。「八裴」之一。
  • 裴憲，字景思，豫州刺史，《晉諸公贊》話佢「有清識」。
    • 裴挹
    • 裴瑴
  • 裴禮
  • 裴遜
  • 有粒女，嫁畀衛瓘嘅仔。

參攷資料

• 房玄齡。〈列傳第五：裴楷傳〉. 《《晉書》》。
• 陳壽（著）；裴松之（注）。〈魏書：和常楊杜趙裴傳 — 裴潛傳〉. 《《三國志》》。｢潛少弟徽，字文季，冀州刺史。……次楷，字叔則，侍中中書令、光祿大夫、開府。……康、楷、綽皆為名士，而楷才望最重。晉諸公贊曰：……楷少與琅邪王戎俱為掾發名，鍾會致之大將軍司馬文王曰：『裴楷清通，王戎簡要。』文王即闢為掾，進歷顯位。謝鯤為樂廣傳，稱楷雋朗有識具，當時獨步。……楷子瓚，中書郎。次憲，豫州刺史。……瓚、遐並有盛名，早卒。晉諸公贊稱憲有清識。｣