大包米

大包米（粵拼：daai6 baau1 mai5；英文：Tai Pau Mai），又叫黑頭角（hak1 tau4 gok3；Blackhead Point）同訊號山（seon3 hou6 saan1；Signal Hill），係香港九龍尖沙嘴東南近岸邊一座山仔，個樣似包米咁。座山原本係海角，喺尖沙嘴澳仔同紅磡灣之間，南面對住維多利亞港。後尾佢三面都填晒海。1907年到1933年間，皇家香港天文台喺座山度報時。家下變咗個訊號山公園（Signal Hill Garden），仍然留有訊號塔同埋部份舊文物。個山周圍曾經削直，畀四條街圍住。東係漆咸道南、南係梳士巴利道、西係緬甸臺，同北面係棉登徑，山南建有中間道兒童遊樂場（Middle Road Children's Playground）。

1870年尖沙嘴澳仔遠望凸起嘅山仔，好似包米咁嘅，就係大包米

史

1845年大包米位置

1908年嗰陣嘅訊號塔。

1927年嘅訊號山，中央有風球訊號同塔頂時間球。

大包米原本係個似包米嘅山仔，高約40米，三面環海，係個海角，北面連住九龍半島，背面有尖沙嘴幾條村，東北紅磡灣有個大沙灘。西面係尖沙嘴灣，又係另一沙灘。隔個灣係家下舊水警總部嘅九龍角。

大包米另一個名叫黑頭角，英文叫Blackhead Point。黑頭係英文Blackhead直譯，個名原本係一個歸化咗嘅德國人Friedrich Johan Berthold Schwarzkopf，佢將個姓Schwarzkopf改成英文名Blackhead。

1907年皇家香港天文台喺黑頭角起座訊號山訊號塔，取代原來水警總部嘅報時塔。因為咁嘅關係，大包米又叫做訊號山。訊號塔起好之後，天文台喺1908年1月，將原本喺水警總部嘅時間球，搬到訊號塔，同香港船隻報時。另外，訊號塔側邊重有座屋仔，喺打風嗰陣，就會掛起風球，畀周圍嘅人警戒。

1900年代初，香港要起九廣鐵路，路軌由紅磡去到尖沙嘴。大包米周圍就開始填海，而漆咸道、梳士巴利道同九廣鐵路先後落成。大包米唔再係海角。

時而世易，報時已經轉用無線電，用時間球報時已經落伍，加上日久失修同人手不足，香港政府於決定喺1933年6月30號拆咗時間球，訊號塔就此荒廢。但鄰近嘅屋仔重有用。

1980年，市政局接管個山，修復訊號塔。重修後，1981年辟做訊號山公園，家下歸康樂及文化事務署管。訊號塔開畀公眾參觀，而屋仔就改成公廁。同時，火車由尖沙嘴縮到去紅磡。大包米對出嘅填地，就用咗來起新世界中心，同海港隔絕。

參攷

• 訊號塔碑記，位於訊號山公園內。
• 香港授時服務歷史，香港天文台，2007年7月19日造訪。
• 香港掌故趣聞小博士，嚴吳嬋霞，新雅文化事業有限公司，1996年3月。

睇埋

• 香港二級歷史建築
• 尖沙嘴鐘樓
• 海角
• 塔

出面網頁

• 香港授時服務歷史，香港天文台
• 尖沙咀訊號山公園 - Google 地圖