評劇
提示：呢篇文講嘅唔係劇評。評劇係喺中國華北、東北一帶流行嘅地方戲曲劇種，評劇嘅特點係念白同口語化嘅唱詞，由於分布地域好廣闊，好容易聽得明，所以好受觀眾嘅歡迎[1]。
源流
編輯評劇係好新嘅劇種，形成時間大約係1910年左右，原名叫「平腔梆子戲」，又叫「唐山落子」、「落子戲」或者「蹦蹦戲」；評劇嘅起源可以追溯到河北東部嘅「蓮花落」，係河北嘅地方戲曲之一，係喺中國嘅華北、東北一帶嘅北方地區流行嘅地方戲曲劇種[2]。
由於「蓮花落」大受歡迎，藝人將「蓮花落」改良，又吸收咗梆子、京劇等劇種嘅表演方式同音樂元素，同時亦都受到唐山皮影戲音樂嘅影響，開創咗叫「平腔梆子戲」嘅新劇種，後嚟又形成咗「唐山落子」同埋「奉天落子」[2]。喺中華民國時期，北京叫做北平，所以當時嘅「京劇」因為政治原因，改咗叫「平劇」、「平戲」，之後又改咗叫「國劇」[3]。喺1923年，警世戲社喺天津演出嘅時候，由於上演嘅劇目多數係「評古論今」嘅，所以「平腔梆子」嘅名宿呂海寰建議將平腔嘅「平」字加多個「言」字旁，叫做「評劇」，所以「平腔梆子」嘅簡稱就由「平劇」、「平戲」嘅簡稱就改咗做「評劇」、「評戲」，呢個名就咁確立咗，一直用到依家[2]。
特色
編輯喺「唱」、「做」、「念」、「打」呢四個傳統戲曲藝術手法方面，評劇更加注重唱功；評劇唱嘅歌詞好淺白易明，吐字要求清楚。例如根據《聊齋志異》嘅「寄生」改編成嘅經典評劇喜劇《花為媒》選段「報花名」嗰度，趙麗蓉飾演嘅阮媽，佢歌聲高亢嘹亮，幾十句嘅唱詞一口氣唱完，而且字正腔圓；至新鳳霞飾演嘅張五可，就唔用高腔，歌聲玲瓏婉轉，甜潤清醇，一樣係字正腔圓[2][4]。評劇唱腔喺「蓮花落」、「蹦蹦戲」嘅音樂為基礎，又吸收咗梆子、京劇嘅唱法形成；評劇嘅唱腔係板腔體結構，由一板一眼、一板三眼、有板無眼、無板無眼四種形式組成，常用嘅板式包括慢板、二六板、垛板、散板、流水板等[2][4]。評劇嘅伴奏樂器分為文場同武場：武場用板鼓、梆子、鑼、鑔等比較剛強嘅樂器；而文場就用板胡、二胡、中胡、低胡、琵琶、笛、笙等相對柔順嘅樂器[5]。近嚟有啲評劇仲會用啲西方樂器，例如大提琴、小提琴等。
評劇嘅行當由最初嘅只有男女角，發展成主要係以小生、小旦、小花臉（小丑），即係所謂嘅「三小」；隨住評劇嘅發展而慢慢完善，逐漸形成嘅，評劇嘅行當吸收咗京劇、梆子等劇種嘅行當，形成咗生、旦、淨、丑四大門類[1][6]。
從20世紀初期到依家，評劇演出咗大量嘅時裝戲，雖然京劇受到話劇嘅影響，亦都創作咗一啲時裝戲，但係評劇創作、演出嘅現代戲或者叫時裝劇，相對嚟講比較多，而且評劇現代戲創作演出一直都無停過。民國時期嘅1950年代，喺北京成立嘅中國評劇院，就以創作演出評劇現代戲為主要嘅任務。
評劇就好似佢正式嘅名「平腔梆子」所突顯嘅，係「梆子戲」嘅一種，同其他梆子戲一樣，主弦都係以板胡為主，都係板腔。
傳統主要劇目
編輯
主要人物
編輯劇本：成兆才（1874—1929），係其中一個最早創作評劇嘅人，係評劇劇本創作嘅鼻祖，佢一生整理、改編、創作嘅評劇劇本多達一百零二個。
旦行：月明珠（1898—1922），原名叫任善豐，係出名嘅評劇男旦，亦係旦行嘅鼻祖。先後演出過《馬寡婦開店》、《花為媒》、《王少安趕船》、《杜十娘》、《佔花魁》、《六月雪》等。
生行：倪俊生（1895—1970），「倪派」小生唱腔嘅創造者。先後演出過《因果變報》、《夜審周子琴》、《秦雪梅弔孝》、《回杯記》、《劉伶醉酒》、《賣油郎獨佔花魁》、《打狗勸夫》、《敗子回頭》、《杜十娘》等。
魏派：魏榮元（1923—1976），評劇花臉、老生，魏派創始人。先後演出過《鍾離劍》、《孫龐鬥智》、《奪印》、《包公三勘蝴蝶夢》、《包公賠情》、《秦香蓮》等。
張派：張德福（1931年出生），評劇張派小生創始人。先後演出過《劉巧兒》、《祥林嫂》、《楊三姐告狀》、《花為媒》、《櫻花戀》等。
洪派：洪影（1930—2012），評劇女小生、兼老生，洪派創始人。先後演出過《劉翠萍哭井》、《梁祝》、《劉伶醉酒》、《十五貫》、《紅龍傳》、《周仁獻嫂》、《孫安動本》、《孫龐鬥志》、《御河橋》、《王二姐思夫》等。
馬派：馬泰（1935—2004），評劇老生，馬派創始人。先後演出過《懷鄉夢》、《小借年》、《馬寡婦開店》、《奪印》、《金沙江畔》等。
著名演員
編輯- 白玉霜
- 小白玉霜
- 新鳳霞
- 魏榮元
- 馬泰
- 趙麗蓉
- 李憶蘭
- 張德福
- 李惟銓（李惟全）
參考資料
編輯- 張平、郭民傑，《中國評劇群星譜》，中國戲劇出版社，2004年，北京。
出面網頁
編輯- 评剧Wayback Machine嘅版面存檔備份
- （北京）中國評劇院網站
- 评剧戏迷的博客Wayback Machine嘅版面存檔備份
參考
編輯- ↑ 1.0 1.1 施德玉 (2018-12-01)。〈河北省雄安新區非物質文化考察－大馬莊村評劇團〉。《戲曲學報》 (19): 39–63。doi:10.7020/JTCT.201812_(19).0002。
- ↑ 2.0 2.1 2.2 2.3 2.4 〈香港電台網站 中華文化：中國戲曲查篤撐〉。www.rthk.hk。喺2024-04-05搵到。
- ↑ 王聖安 (2015-01-01)。〈臺灣音樂中的臺灣意識— 從後殖民觀點探究解嚴後之國小音樂教科書〉。《臺灣大學音樂學研究所學位論文》。2015: 1–148。doi:10.6342/NTU.2015.00551。
- ↑ 4.0 4.1 李中會 (2010) 《戲曲鑑賞》北京師範大學出版社, ISBN:9787303110230
- ↑ 殷旵 (2007) 《中華傳統文化精要普及讀本》 第三冊 ，北京工業大學出版社 ，ISBN 9787563918201
- ↑ 〈中國戲曲 —— 評劇 - 民俗與傳說 - - (移動版)〉。《看中國》。2011-02-21。喺2024-04-05搵到。