描述語言學（粵拼：miu4 seot6 jyu5 jin4 hok6；英文：descriptive linguistics），又叫描寫語言學，係一種語言學，指根據語言群落嘅使用習慣，純客觀噉分析同描述啲人點樣用語言。描述語言學唔嘗試特登改變啲人用開語言嘅方法，純粹係研究唔同語言當時嘅用法。描述語言學可以係一種觀點，叫語言描述主義，佢反對「語言要噉噉噉用先至算係啱」嘅諗法，同語言規範主義相對。
現代所有語言學嘅學術研究都係跟從描述語言學嘅。描述語言學追求嘅係，唔帶偏見噉描述現實中語言嘅使用方式，就好似科學噉。
