規範語言學

規範語言學（粵拼：kwai1 faan6 jyu5 jin4 hok6；英文：prescriptive linguistics）係一種語言學，指編製使用語言嘅規則同「最佳」用法。規範語言學會嘗試特登改變啲人用語言嘅方法。規範語言學可以係一種觀點，叫語言規範主義，佢提倡「語言要噉噉噉用先至算係啱」嘅諗法，同語言描述主義相對。

規範語言學編製嘅規則主要係寫法、串法、讀音、詞彙、句法、語義、文法等，有時甚至包括政治正確。佢有時係源於語言純淨主義。規範語言學成日都會有某啲語言用法唔啱、唔協調、唔合理、唔好溝通、唔靚嘅意味，不過有時規範嘅用法重少用過普遍用法。

規範語言學可以用嚟建立一套標準語言。