調景嶺

調景嶺（粵拼：tiu4 ging2 ling5，又讀tiu4 geng2 leng5）係香港新界近將軍澳一個近照鏡灣（粵拼：ziu3 geng3 waan1*4）嘅山區，對住個大港將軍澳（佛堂門）。因為要起將軍澳新市鎮，個灣填晒海變咗做住宅區，家下山同填地都喺呢個新市市鎮東南邊位。調景嶺因為響國共內戰後係國民黨餘部走難來香港，住響呢度寮屋區出名。呢個地方因為就響新九龍曬草灣東面嘅山後面，初期未有確定嘅政區之前，係當做新九龍一部份，之後就將佢劃入新界西貢區。

由高處嘅澳景路望調景嶺

名

調景嶺。右邊係照鏡環山

調景嶺呢個名其實係原自照境灣，而呢個灣西南面有座山叫做照鏡灣山。照境灣個形好似一個闊口袋咁，而住響水上嘅蜑家人見佢風平浪靜，好似塊鏡咁照得人，就叫佢做照境灣。照境灣英文寫係叫Tiu Keng Wan，呢個音應該唔係廣東話﹙廣州話）音，好可能係蜑家音。

1899年英國同大清租埋新界，呢度就咁歸入香港管。響呢個時候，有好多西人住響香港，亦都好多華人轉食麪包，咁就好需要麪粉。咁加拿大人Alfred Herbert Rennie就睇準呢個機會，想響香港發展呢門麪粉廠生意，佢就同當時香港名人摩地同遮打夾份開間Hong Kong Milling Company。而香港政府見呢門生意亦都幫到駐港英軍同全人口所需，尤其係想畀人斷糧都夠全部人四個月食，咁就響呢個灣口北岸，填塊地(New Kowloon Inland Lot No. 4)，畀佢起麪粉廠。響當時地圖睇，呢塊地響1905年已經填好，塊地有435頃。呢間廠好先進，電器化廠房，有碼頭設施，有員工宿舍。響1908年嘅年鑑裏面有講，佢可以一個月用6000噸小麥生產8000袋優質麪粉。自始呢塊地就響地圖上面英文寫做Rennie's Mill或者Rennie's Flour Mill，即係Rennie嘅麪粉廠咁解。不過好境不常，因為生意失敗，呢位老闆1908年響廠側邊跳海自盡。

之後個灣叫做吊頸灣，原因係照境灣個英文寫做Tiu Keng Wan，譯返做廣東話就叫吊頸灣。而咁啱麪粉廠老闆係自殺，民間就誤會佢係吊頸自殺。後尾國民黨人搬到呢個灣，就住晒響灣邊山區，所以就叫呢度叫做吊頸嶺。有人住，重叫吊頸實在唔老禮，咁政府就改名做調景嶺。但英文就一直叫呢區做Rennie's Mill，要發展將軍澳新市鎮呢一區，先改做廣東話譯名Tiu Keng Leng。

出面網頁

• 〈有關故仔〉 (日文).