貝澳

貝澳，正名杯澳，古名螺杯澳，係香港大嶼山南岸一個嘅有人住嘅地方，俟住嶼南道。由老圍、新村、羅屋同埋鹹田等幾條村夾埋。喺歷史文獻之中，叫做螺杯澳或螺盃澳。

從天后宮外嘅沙灘，向西望嘅貝澳泳灘。後面由左至右可以見倒大東山、二東山同埋蓮花山三座高山，圖嘅右面係潟湖出海口。

黃昏時分，貝澳泳灘嘅西邊。

日落時分，貝澳泳灘嘅西部。

挨晚，貝澳泳灘東邊。後面係芝麻灣半島。

貝澳泳灘

貝澳出土嘅六朝青釉六系陶罐。（收藏喺香港文物探知館）

貝澳泳灘而家係康樂及文化事務署管理嘅泳灘，有更衣室、沖涼、露營同燒嘢食呢啲設施，泳季重會有救生員當值。

名

貝澳個地形好似個螺咁樣，所以佢亦叫做螺杯澳。螺盃澳個名早喺明朝萬曆（1573年 - 1620年）嗰時，喺郭棐嘅《粵大記》已經有記載。

史

貝澳發現過新石器時代嘅嘢，即係可能喺幾千年前，已經有新石器時代嘅人喺貝澳住。喺清朝世祖順治十八年（1661年），大嶼山居民因為遷界令而要搬走，復界之後（1669年）先陸續返返嚟住。

貝澳主要分為四條村，包括姓張嘅老圍同鹹田，同埋姓何嘅新村同羅屋。每條村都有宗祠同埋社壇，而且有風水林。老圍而家仍然有一邊石砌矮圍牆，用嚟阻擋水浸嗰時嘅洪水。貝澳村民以前一係耕田，再唔係就捉漁。喺河口嗰邊，有座清朝仁宗嘉慶四年（1799年）起嘅天后宮，間廟面對西南方，背山面海，裏頭重有一個銅鐘。喺天后宮附近有洪聖廟嘅遺址。

一九五六年到一九六三年，香港缺食水，香港政府起石壁水塘，開嶼南道、東涌道同大澳道，連貫各地。喺貝澳南部，連到分流嘅山水，全部截住，引去水塘。就係咁樣，搞到田地冇水灌溉。之後，耕田嘅村民唔耕，放晒啲水牛，另謀生計。而家村民大多數做渡假屋同士多生意。

地理

貝澳嘅地形

貝澳位於大嶼山東南面，喺大嶼山嘅南岸。貝澳東面係芝麻灣，南面係貝澳灣（係一個海灣），西面係長沙，北部係南大嶼郊野公園。貝澳係一個沙咀，幾條河由附近嘅山流入海，或者流入石壁水塘，其中一條河經過梅窩西南嘅山谷流入貝澳灣。海水同河水形成一個又鹹又淡嘅水嘅交界嘅地形同生態，海邊沖積成個螺形嘅海灘。

貝澳對外嘅海灣係貝澳灣。

介紹

海灘

貝澳海灘設有更衣室、廁所、淋浴、救生員，由康樂及文化事務署管理。海灘裏頭有士多，有賣游水用品、嘢食。因為海灘嘅水分別係嚟自海同埋河，貝澳海灘就喺鹹淡水交界。個海灘嘅水質，每年都會俾環境保護署評做良好（一級）或者 一般（二級），冬天就唔評級。

喺2008年6月26號至6月30號，康樂及文化事務署喺貝澳海灘做過防鯊網維修工程，個灘閂過一排。

因為貝灘海灘面向西南偏南。所以，喺貝澳可以清楚睇倒日落。

貝澳營地同燒烤場

貝澳營地入口

貝澳燒烤場

喺貝灣海灘入面設有一個公眾同埋免費嘅營地，全年開放畀人露營，由康樂及文化事務署管理。有 52 個露營位，每個營位用木欄間開，地面一般係沙。

貝灣海灘有個免費公眾嘅燒烤場地，畀市民燒嘢食。場地入面有幾十個爐，大部分嘅爐都喺露營位附近。

要露營要到管理處登記先，唔收錢，但係管理處唔提供露營或燒嘢食用具，自己帶嚟或者去鋪頭買。另外，康樂同文化事務署規定都唔可以帶狗入營地，不過，營地時不時都會有流浪狗出入。

交通

• 新大嶼山巴士：
  • 1：大澳往返梅窩
  • 3M：梅窩往返東涌
  • 4：梅窩往返塘福
  • A35：梅窩往返赤鱲角香港國際機場