賢學思政
賢學思政（粵拼：yin4 hok6 si1 jing3，英文：Student Politicism）係香港一個本土派學生組織，喺2020年5月26號成立，2021年9月24號宣佈解散。組織召集人係王逸戰。
賢學思政 Student Politicism | |
| 秘書長 | 陳枳森 |
| 召集人 | 王逸戰 |
| 發言人 | 黃沅琳 |
| 創立 | 2020年5月26號 |
| 解散 | 2021年9月24號 |
| 政黨口號 | 「賢學啟志 衛民思政」 |
| 政治派系 | 本土派 |
| 網站 | facebook |
歷史
編輯- 2020年5月26號：賢學思政成立。
- 2020年10月10號：賢學思政喺香港唔同地方舉辦為期三個星期嘅反送中攝影相展[1]。
- 2020年11月30號：賢學思政四名成員，包括召集人王逸戰喺「Save12」街站後以「非法集結」罪名被捕[2]。
- 2020年12月13號：賢學思政幫在囚人士收集獄中物資，一個鐘就收到40袋[3]。
- 2020年12月29號：賢學思政召開記者會，表示畀國安人員警告違反港區國安法[4]。
- 2021年9月20號：警務處國家安全處人員以國安法入面「串謀煽動顛覆國家政權罪」，上門拘捕「賢學思政」召集人王逸戰、秘書長陳枳森同前發言人朱慧盈。警方國家安全處高級警司李桂華指出，警方喺拘捕行動入面搜查組織地址同倉庫，檢獲大批街站物品、刊物、傳單、電腦同電話等，亦有送去懲教署所嘅認可物品。李桂華指，「賢學思政」由2020年5月成立，即使《香港國安法》生效後，仍然不斷喺社交平台發表涉及危害國家安全嘅言論，一共擺設41次街站，發放大量煽動仇恨政府，不服從法律同煽動顛覆政權嘅訊息。李桂華舉例，「賢學思政」呼籲公眾唔使用「安心出行」，並使用假資料填寫登記表；又曾經指出「光復香港，時代革命」係民族信念，並非一個口號，又話下一場抗爭可能係戰爭或革命，所以要裝備好心態同技能；又建議其他人習武，當革命來臨時要全民勇武抗爭。另外，李桂華表示，「賢學思政」又指抗爭係對準港共政權同中共政權，明顯係企圖顛覆中國政權。李桂華又表示，「賢學思政」凝聚志同道合人士，喺旺角成立畀追隨者聚腳嘅會址，進行展覽同買賣，亦有系統咁向相同信念嘅在囚人士提供物資。李桂華強調，協助在囚人士係無問題，但係如果有人透過協助在囚人士，招攬追隨者以增加影響力，意圖繼續危害國家安全係有問題。之後，被捕三人曾經申請保釋，但係都被拒絕[5][6]。
- 2021年9月22號：警務處國家安全處喺旺角拘捕「賢學思政」發言人黃沅琳，涉嫌違反《香港國安法》嘅第22同23條「串謀煽動他人實施顛覆國家政權」罪[7]。
- 2021年9月24號：賢學思政發表公告，表示組織已經再無運作空間，宣佈正式解散，遣散所有成員同義工，並停止一切事務[8][9]。
參考
編輯- ↑ 〈學生組織「賢學思政」銅鑼灣展出抗爭相片 警拉橙帶截查 稱鼓吹暴力或檢控〉。立場新聞。2020-10-10。原先內容歸檔喺2021-05-02。喺2021-05-18搵到。
- ↑ 〈7人參與「12港人」街站後被捕 包括4名賢學思政成員〉。明報。2020-11-30。原先內容歸檔喺2021-05-02。喺2021-05-18搵到。
- ↑ 〈賢學思政1小時收40袋物資送在囚人士80歲婆婆斥林鄭無良心：害到班後生咁慘〉。蘋果日報。2020-12-13。原著喺2021-05-07歸檔。喺2021-05-02搵到。
- ↑ 周滿鏗 (2020-12-29)。〈警方國安處曾晤學生組織「賢學思政」 成員稱有心理準備坐監、不會流亡〉。眾新聞。原先內容歸檔喺2021-05-03。喺2021-05-18搵到。
- ↑ 〈國安處：賢學思政3人被捕 曾籲勿用安心出行、向在囚者提供物資 涉煽動分裂顛覆政權〉。立場新聞。2021-09-20。原先內容歸檔喺2021-09-20。喺2021-09-22搵到。
- ↑ 〈列舉「罪證」指控賢學思政串謀顛覆國家政權 李桂華答記者疑問全文〉。立場新聞。2021-09-20。原先內容歸檔喺2021-09-21。喺2021-09-22搵到。
- ↑ 〈消息﹕賢學思政黃沅琳自首被捕 被指串謀煽動顛覆政權〉。立場新聞。2021-09-22。原先內容歸檔喺2021-09-23。喺2021-09-22搵到。
- ↑ 〈賢學思政解散公告〉 (香港中文、英文)。賢學思政。2021-09-24。原先內容歸檔喺2020-12-29。喺2021-09-24搵到。
- ↑ 〈賢學思政宣布解散〉。香港電台。2021-09-25。原先內容歸檔喺2021-09-25。喺2021-09-25搵到。
