軍事戰術一覽

以下係主要嘅軍事戰術詞彙一覽。

以下嘅詞彙，好多都係喺射擊遊戲等模擬打仗嘅電子遊戲類型當中都有用嘅。

戰術概念

1962 年美國空軍影到嘅相；幅相顯示蘇聯嘅貨車運導彈畀古巴。睇埋古巴導彈危機。

内文：軍事戰術

• 機動性（mobility）：指一件物體（一隊部隊或者一件武器呀噉）有幾能夠為咗達致目的而快速噉郁。
• 撤退（withdrawal）：指一隊軍人向自己陣地嗰邊退返，同時佢哋同敵隊保持一定距離得嚟又保持接觸；喺戰術上，撤退有好多種用途，例如想像有隊部隊 A 特登扮撤退引敵人追趕佢哋，跟住追到咁上下 A 嗰班事先匿埋好嘅同伴就埋伏嚟追趕 A 嘅敵人；除此之外，「特登撤退，引敵人嚟追」噉嘅做法又可以用嚟引敵軍部隊離開主戰場，間接搞到敵軍不自覺噉分散咗－「敵軍分散咗」可以係戰術上嘅大優勢。
  • 例如喺出名嘅希斯汀戰役（Battle of Hastings）當中，諾曼人嘅軍隊就用咗扮撤退嘅戰術。
• 偵察（reconnaissance，簡稱 recon）：係指探索自己軍隊佔據嘅地頭以外嘅地方，目的係想攞到一啲對戰術嚟講重要嘅資訊，包括笪戰場嘅地勢、敵軍嘅數量同分佈、以及係「敵軍喺度做緊啲乜」呀噉；偵察可以用好多唔同方法做－例如係派士兵（偵察兵）帶住望遠鏡等嘅架生去睇、派（往往有咁上下隱蔽能力嘅）飛機去睇、或者係用人造衛星影相拍片... 等等；偵察係一樣相當高技術嘅工作－做偵察嘅軍人需要
  • 有高機動性－偵察工作本身係唔預要戰鬥嘅，而且帶得多武器會搞到佢哋機動性跌，所以偵察兵正面戰鬥力唔會好勁；偵察兵要能夠快速噉郁動，能夠喺畀敵軍發現嗰陣快速撤退；
  • 對敵軍嘅文化同行為有咁上下熟，能夠睇得出敵人嘅每樣行為係代表緊乜；
  • 識得用雷達同人造衛星等嘅架生... 呀噉。
• 集中火力（force concentration）：戰術上認為，「優勢」會隨「人數」嘅二次方增長，即係話 4 個打 2 個嘅優勢（$4^{2}-2^{2}=12$）超過 3 個打 2 個（$3^{2}-2^{2}=5$）嘅兩倍，所以集結一大隊人行動會令嗰場行動嘅贏面激增；軍事戰術一般會思考「喺乜嘢情況下要用集中火力呢一張皇牌」嘅問題。
• 制高點（high ground）：指地形上一點，高過周圍嘅地因而戰術上有利，例子有山頂、大廈天台... 總之位置上要高過敵人；由制高點打低地有好多好處，包括係啲士兵會郁得快啲、冇咁快攰、掟嘢（包括矛同石頭等）亦都掟得遠啲，而且指揮員企得高睇得遠、視野闊，方便戰術調動。

小單位戰術

一個士兵用格林機槍係噉淝fe4敵軍嗰邊－壓制式開火。

• 煙幕（smoke screen）：想像家陣有隊部隊，佢哋要通過笪開放嘅地（笪地上面冇乜建築物或者樹等可以攞嚟做掩護嘅物體）；如果佢哋就噉行嘅話，好容易會畀敵人直接開火淝；喺呢種情況下，佢哋一個可能做法係用煙幕彈－煙幕彈會產生煙，跟住隊部隊就可以喺煙嘅掩護之下行過笪地；一股攞嚟隱藏軍事單位嘅位置嘅煙，就係一股煙幕。
• 壓制式開火（suppressive fire）：指一個軍事單位開火，但佢目的唔係要打中任何目標，而係想壓制敵人嘅表現。簡單例子：想像 A 同 B 兩隊喺度交戰，
  1. A 隊有個士兵阿 X 用把火力勁射速高（例如格林機槍）嘅槍係噉向敵人嗰邊開火；
  2. B 隊有掩護物保護，唔驚畀子彈打中；不過佢哋見到有把機槍係噉向住佢哋嗰邊淝，個個都淨係可以匿埋喺掩護物後面，心知自己一離開掩護物就會畀子彈打中（壓制敵人表現）；
  3. 於是阿 X 啲隊友就可以趁住敵人唔敢郁，用呢個時機撤退－阿 X 唔係想殺敵，係想靠開火支援隊友，佢做嘅嘢就係壓制式開火。

進攻戰術

馬拉松戰役當中用嘅側擊戰術圖解；希臘方嘅部隊（藍色）側擊波斯方嘅部隊（紅色）。

• 埋伏（ambush）：指一隊部隊運用隱蔽上嘅優勢（對方唔知自己方喺邊個位）嚟出奇不意噉攻擊放低咗戒備嘅敵人；使用埋伏嘅部隊，好多時都係有地理上嘅優勢，例如場戰鬥喺一笪多掩護物嘅地方（山或者森林呀噉）進行，而自己方對笪地熟啲，知邊啲位置有地方可以匿埋，所以就利用呢點埋伏進入笪地嘅敵人。埋伏呢種戰術歷史好悠久－史前嘅人類已經有用埋伏嘅做法，獵殺大隻（人類唔能夠正面制服）嘅獵物
• 側擊（flanking）：指一隊部隊移去敵人嘅側面，爭取戰略上嘅優勢；喺軍事上，一隊部隊嘅攻擊力量主要會集中喺最前方，所以由側面或者後面攻擊就等如攻擊緊敵人一個反擊能力比較弱嘅部份，令到自己嘅攻擊比較大機會成功，而且亦有人指側擊能夠達到一定嘅心理戰效果－敵方嘅士兵覺得自己受包圍，容易驚同喪失士氣。負責做側擊嘅部隊好多時都係機動性高啲嘅，能夠以快啲嘅速度郁動。
• 靠開火偵察（recon by fire）：想像家陣有位士兵 X，佢大致知敵方喺邊個位，但佢唔肯定敵方嘅確切位置，於是佢就攞武器向住敵方嘅大致位置開火，敵方可能會諗住自己畀人發現咗，因而郁動或者郁手還火－噉 X 就成功得知對方喺邊個位，達到「用開火嚟做偵察」噉嘅效果。

欺騙戰術

内文：軍事欺騙

軍事欺騙（MILDEC）係指一個軍事單位喺戰鬥嗰陣做某啲嘢，令敵方得到錯誤嘅資訊，因而採取錯誤嘅行動，幫助做出欺騙行動嘅單位達成目的。例子可以睇返上面講咗嘅扮撤退。

• 帕提亞回射（Parthian shot）：一種古時畀輕騎兵用嘅戰術；指騎住喺隻馬上面、揸住弓箭嘅單位後退（睇埋假扮撤退），跟住擰返轉頭向追佢嘅敵人射擊。
• 打完閃戰術（hit-and-run tactics）：指攻擊者係噉做「搵個方便攻擊又多逃走路線嘅地點，突然向對手作出攻擊，然後即刻走佬」嘅過程；用呢種戰術嘅通常係因為攻擊方敵眾我寡，冇能力同敵人直接交戰，於是就係噉打完閃，試圖靠噉嚟慢慢削弱敵人嘅戰力。
• 搔擾式開火（harassing fire）：一種心理戰戰術，指自己隨機唔定時噉向敵方係噉咦（用火力唔係咁勁嘅武器）開火，尤其係喺夜晚呢啲令人放鬆戒備嘅時段，持續噉做一段時間，目的係要令敵方士兵持續處於緊張嘅狀態難放鬆，從而慢慢噉磨損敵方嘅士氣。

睇埋

• 軍事戰略一覽
• 射擊遊戲
• 孫子兵法