電腦軟件

電腦軟件din6 nou5 jyun5 gin2（英文：computer software），或者就咁叫軟件（英文：software），亦叫電腦軟體或者軟體，係指電子儲存資料，包括電腦程式同其他資料，畀電腦讀同寫。軟件查實係相對電腦硬件而言，硬件係實物，可以掂到摸到嘅電腦部份，而軟件唔係實物，掂唔到摸唔到，但又係電腦不可或缺嘅一部份。軟件有時淨係單係應用軟件。

一個電腦軟件嘅界面例子

定位

睇埋：電腦程式

一隻電腦軟件由一個或者一柞電腦程式組成，存在嘅意義係要提供某啲功能；例如一隻 Hello World 嘅程式除咗攞嚟教入門嘅程式編寫之外冇咩功能可言，但

• 一隻系統軟件－包括作業系統（OS）－會負責管理部電腦嘅硬件運作，而廿一世紀初嘅電腦冇咗作業系統基本上唔會用得到；
• 一隻繪圖軟件－例如 Photoshop 或者小畫家噉－可以俾用家攞嚟製作圖像；
• 一隻電子遊戲可以俾用家玩一隻遊戲，達到「令佢開心過癮」嘅效果；
• 一隻數據庫管理系統可以俾用家用嚟管理數據庫；

... 如此類推。軟件好多時仲會因為佢哋嘅強大功能而有相當嘅經濟價值，即係可以攞去賣嚟賺取利潤，而且一隻軟件仲可以掕埋拉臣同埋說明書等相關嘅文件；而工程學就係泛指用知識嚟設計同建造一啲有用嘅物品嘅過程，並且喺途中盡可能令成本效益有咁高得咁高（花費最少嘅資源嚟做到最多嘅嘢），例如電子工程專門設計智能電話等嘅電子架生噉，會用到物理學上有關電同磁嘅知識。

－軟件工程就係工程學嘅一門，專門用知識嚟設計同建造電腦軟件，尤其係會用到電腦科學上嘅知識。

睇埋

• 軟件工程
• 複雜系統