遊戲道具

遊戲道具（粵音：jau4 hei3 dou6 geoi6 | 英文：in-game item）係指遊戲進行過程當中玩家可以獲取嘅物品。呢啲物品有各式各樣嘅功能，有啲對玩家有利，例如係 RPG 當中常見，用咗可以回復生命值嘅物品（外觀上通常係藥包或者藥水）；又有啲道具對玩家有少少害，例如一件重嘅裝甲，裝備咗可以提升防守力，但會令速度下降；又有啲道具係冇乜用，純粹俾玩家攞嚟貪得意收集嘅。喺編程上，個遊戲程式要曉 foreach（睇埋遊戲編程）可以帶道具嘅角色，為嗰個角色記住佢持有乜道具，而且通常要有個道具欄（item menu）俾玩家睇自己個角色有乜道具喺手同撳掣揀用邊個道具。

稀有度

内文：道具稀有度

稀有度（rarity）：一種由道具擁有嘅屬性，代表件道具有幾罕有，通常愈稀有嘅道具愈有價值；喺大逃殺遊戲當中，玩家要搜集生環用嘅道具，好多時一件道具嘅色水代表佢嘅稀有度，例：

• 白色代表「普通」、
• 藍色代表「罕有」、
• 紫色代表「傳說中嘅」（epic）

... 等等），而愈稀有嘅道具就愈勁－等玩家一眼就知眼前嘅道具值唔值得執（例子可以睇要塞英雄）。

虛擬經濟

内文：虛擬經濟

喺某啲類型嘅電子遊戲（尤其係 MMORPG）當中，道具甚至會形成虛擬經濟：MMORPG 多數會有機制，俾玩家收集道具，跟住俾佢哋喺遊戲世界內嘅市場嗰度同 NPC 或者第啲玩家買賣道具－形成一個由電腦碼組成嘅經濟體系；因為噉，有唔少遊戲製作組喺設計遊戲嗰陣會俾錢請經濟學家幫手，甚至親自走去讀少少經濟學。

睇埋

• 蒐集