金蓮花廣場
金蓮花廣場（葡文：A Praça Flor de Lodão，英文：Lotus Square或Golden Lotus Square）喺澳門半島新口岸高美士街、畢仕達大馬路同友誼大馬路之間。呢個廣場係慶祝1999年澳門回歸而設立，具有政治意義，係依家澳門其中一個出名地標同旅遊景點。
1999年12月20號，中華人民共和國接收澳門主權，成立澳門特別行政區，中央人民政府送咗「盛世蓮花」嘅雕塑，分別係大細各一件畀澳門，寓意澳門繼續繁榮昌盛。同1997年香港回歸嗰時送畀香港特別行政區嘅「洋紫荊」花寓意一樣。
盛世蓮花雕像喺1999年12月17號由工程人員安裝喺廣場度。12月20號中午由嗰時主管澳門事務中華人民共和國國務院副總理錢其琛主持揭幕儀式。
升旗儀式
編輯金蓮花廣場升旗儀式喺每朝早8點舉行，而黃昏6點會有降旗儀式。升降旗儀式都係由9個着制服嘅警員執行。
金蓮花廣場原本無旗桿同升旗儀式安排。2000年開始，澳門特區政府為咗慶祝國家成立51週年，參考香港金紫荊廣場升旗儀式做法，喺嗰年9月安置兩支旗桿，而升旗儀式喺2000年10月1號第一次舉行。
喺國慶日、澳門回歸紀念日，澳門特區政府全體主要官員、立法會主席、中央人民政府駐澳門機構負責人、中國人民解放軍駐澳門部隊司令員等會出席升旗儀式。
