陳欣兒

陳欣兒（英文：Janice Chan，1989年1月18號—），係香港民主黨員，南區區議會利東一選區前任議員。

陳欣兒大學讀香港理工大學社會政策及行政系，實習嗰陣已經幫過民主黨手，之後就正式加入民主黨，開始做南區區議員區諾軒嘅議員助理。隨住區諾軒退出民主黨同參選立法會補選做咗立法會議員，區決定將區議員職務交棒畀陳欣兒。陳欣兒喺2019年第6屆區議會選舉參選南區區議會利東一選區，最終成功當選，順利接棒。

2021年7月頭，佢同黨友羅健熙、徐遠華、陳炳洋、潘秉康、黎熙琳、嚴駿豪一齊劈炮唔撈，辭任區議員。