陳炯明

陳炯明（1878年1月13號—1933年9月22號），字競存，廣東汕尾海豐人，中華民國嘅軍事同政治人物，1933年死喺香港。

生平

陳炯明三歲喪父，六歲入私塾讀書。1897年喺廿一歲嘅時候入縣學讀書。1906年入廣東法政學堂。1908年7月，以最優等畢業。畢業之前就已經喺海豐提倡「自治會」、「戒煙局」、「育嬰堂」同埋「縣倉」等嘅社會福利政策。畢業之後嘅1909年，佢更加喺海豐籌辦「自治報」關注社會問題。

1909年6月，佢做咗「廣東諮議局」議員，仲提出廢除唔經審判就地正法嘅刑罰，提議禁絕一切賭博等。1909年冬天趁住去上海開會嗰陣祕密加入「同盟會」。

1910年，佢參加廣東新軍起義但係失敗咗。1910年冬天再同革命黨人黃克強、胡漢民等喺香港設「南方統籌部」。1911年3月29號，黃花崗起義，陳炯明擔任選鋒（敢死）隊第四隊隊長，進攻粵督公署，事敗潛逃香港九龍城南。陳炯明同無政府主義者劉師復等同組「東方暗殺團」。六月謀炸水師提督李準但係失敗，不過七月就成功將啱啱上任嘅廣州將軍鳳山炸死。

1911年10月10號，武昌起義，佢得到清軍管帶洪兆麟做內應，進佔惠州，仲得到清軍八營，佢號稱「循軍」，用井字旗，寓意古代嘅井田，顯示佢好重視中國社會土地問題。1911年11月，粵督張鳴歧出走，廣東宣佈獨立，胡漢民畀人推舉做都督，陳炯明就做咗副都督。 陳炯明率領佢嘅部隊進駐廣州。1911年12月，胡漢民跟孫中山去咗南京，廣東省議會公推佢做「代理」都督，兼廣東北伐軍總司令。

1912年1月，佢喺廣東宣佈嚴禁煙賭同埋拆除廣州城牆，揀學生去美國同日本留學。1912年4月25號，孫中山想胡漢民做返都督，佢哋一齊返廣州，孫中山向眾人宣揚胡漢民嘅革命功績，26號陳炯明就走避去咗香港。

1913年6月，北洋政府袁世凱罷免胡漢民，任命陳炯明做廣東都督。但係7月18號陳炯明都參加二次革命反對北洋政府，畀北洋政府龍濟光攞到廣東嘅統治權，陳炯明於是去新加坡避難，之後仲去咗歐洲旅行。

1914年7月，陳炯明拒絕參加孫中山喺日本組成嘅「中華革命黨」，拒絕「打指模」。陳炯明與革命黨人黃興、柏文蔚、紐永建、李烈鈞喺1915年2月25號喺海外發表共同宣言，表明「倚賴外力」，即係唔會倚賴外國提供力量、資金。

文獻

• 1913年7月25號，總統袁世凱，《令免廣東都督陳炯明官職文》
• 1924年3月30號，孫文序於廣州大本營，《三民主義/自序》

參考

陳炯明傳，康白石，1978年，ISBN 9787220112805