陶藝

(由陶藝品跳轉過嚟)

陶藝粵拼tou4 ngai6英文ceramic art)係指用陶瓷藝術品嘅過程。

一件陶藝品

陶藝出嗰啲成品可以分成兩大類:一類係日常實用到(functional)嘅架罉,好似碗碟、樽、盆啊呢啲就係,另一類就唔係愛嚟實用(non-functional)、齋做裝飾或者完全係藝術品嘅創作。整返前一類成品要落足心機,就算係出貨少,都會好似工業設計咁要顧及到譬如易用性呢啲咁嘅問題。

工序通睇

睇埋:陶瓷

做形

陶藝嘅第一步係做出個形,而呢個「成形」,主要用三種方法:拉坯(throwing)、倒模(slip-casting)同手捏[1](hand-building)。

拉坯係指用電動嘅拉坯機或者手動嘅製陶轉盤(wheel,行外人叫 potter's wheel),用手藝將泥坯拉成想整嘅樣,之不過好明顯呢個方法淨係整到圓嘢(或者將圓嘢撳扁或者切割做得出嘅形狀)。注漿成形,即係倒模,係指用同少量化學添加劑溝出嚟嘅泥漿(slip),注入預先用石膏製成嘅模,利用咗石膏嗦水嘅特性,喺泥漿畀個模嗦咗幾秒水之後倒走多餘嘅泥漿,再等半乾之後小心攞件嘢出嚟。手捏就泛指其他嘅成形方法,似係雕刻、將泥撳扁再砌呢啲。

成咗形嘅半製成品首先要冚住佢慢慢風乾,到半乾(leather hard)先可以繼續下一個工序,用刀、剉啲架罉修坯[2](trim)。修坯之後可以再同面頭做裝飾[1](surface treatment)譬如雕字、雕圖案呢啲。

上釉

上釉(glazing)唔算係通常必要,但係多數陶藝都會做,尤其係食具會用佢嚟做防水(炅嘅陶瓷就一定係上咗釉)。之不過,西方傳統手工係一般唔會即刻上釉,而係先經過一個叫素燒(bisquing)嘅低溫燒製工序,將件嘢定咗型先。經呢個工序件嘢就會易啲上釉,同埋若果上釉出咗錯可以用水洗走渠,等風乾之後再上過。

釉(glaze)係一種經過高溫之後會變成玻璃質嘅嘢,佢嘅作用除咗用嚟上色之外,亦都幫成件嘢防埋水。釉喺未燒開前,通常係白白灰灰咁,而未有自己定嘅色;經燒製嘅過程,係令啲釉發生化學反應,再變色成燒製度想要嘅嗰款(包括透明)。

雖然釉係防到水,但係唔係乜都防。所以,做食具通常會揀一啲冇有毒物質嘅釉(譬如,鮮紅嘅釉好可能含鉛,幾十年前仲有用,但係而今經已唔應該用[3]:241);齋雕塑品就冇呢種顧慮。

上釉並唔係一種 「想點就會點」 嘅工序,因為釉喺燒嘅過程會變成半流質,甚至乎(若果落得太多,啲材料唔啱份量呢啲)流質,所以通常唔可以完全控制燒成之後啲釉去咗邊。有啲人會利用釉嘅呢種特性做出隨機性嘅效果,但係若果要畫一啲精細嘅畫或者寫字,通常會用釉下彩(underglaze)或者某一啲可以用嘅顏料呢類唔會聽個爐燒熔嘅嘢,然後再喺上面加一層透明釉。

上咗釉嘅半製成品首先要風乾,等到乾嗮(bone dry)先去到燒。

燒成

燒(firing)係指用高溫嘅電爐(electric kiln)或者煤氣爐(gas kiln)呢啲,用熱力改變泥嘅物理結構再變成陶瓷質地,呢種過程叫玻璃化(vitrification);之不過燒陶瓷唔係要將啲泥完全玻璃化,反為燒過咗龍,就會令到件製成品出現瑕疵[4],甚至乎熔鬼咗。

用電爐嘅叫氧化燒(oxidation firing),用煤氣爐或者碳爐呢啲嘅叫還原燒(reduction firing)。做陶藝嘅人一般通認為還原燒牽涉到唔同嘅化學反應,所以燒出唔同嘅效果,但係有人指出還原燒其實唔係化學所講嘅還原。[5]

放入爐度燒嘅作品一定要乾透嗮(bone dry),唔係話啲未乾到過嘅水喺燒嘅時候就變水蒸氣,泥包住冇路走嘅話就爆,咁一鑊唔單止嗰件嘢冇咗,連隔籬嗰啲都會冇埋。

工業應用

工業度有半自動化嘅陶藝步驟替代人手,譬如拉坯可以由部自動機嚟拉。工業應用嘅工序譬如風乾方法同燒製嘅先後次序呢啲,好多時同人工做嘅都有唔同。經呢種工業方法出嘅成品,除咗碗碟呢啲嘅一般器皿,仲可以工業生產埋洗手盆、廁盆呢啲。

睇埋

參考

  1. 1.0 1.1 藝手捏工作坊 – 形態及表面裝飾處理. 香港藝術學院. 喺2022年9月15號搵到.
  2. . 香港藝術學院. 喺2022年9月15號搵到.
  3. Rossol, Monona (2001). The Artist’s Complete Health and Safety Guide (第3版). New York: Allworth Press. ISBN 978-1-58115-204-3.
  4. Finkelnburg, Dave (2016). "Vitrification". Ceramic Arts Network. American Ceramic Society. 喺2022年9月15號搵到.
  5. Coppage, Ryan (2022-02-28). "Demystifying the Reduction Firing Process: Defining Reduction Firing to Help Improve Firing Outcomes". Ceramic Arts Network. American Ceramic Society. 喺2022年9月15號搵到.