青衣游泳池
青衣游泳池（英文：Tsing Yi Swimming Pool）係香港青衣島一個泳池，近藍巴勒海峽，響青衣城、青衣運動場、青衣海濱公園同埋青敬路之間。個池響1980年代中已經劃好響現址起，不過要去到1996年，由舊時區域市政局起成，交畀區域市政總署管。2000年區域市政局解散之後，就由康樂及文化事務署接管[1]。
青衣泳池佔地成1.76公頃，係葵青區三公眾泳池之一，另外兩個係葵盛游泳池同北葵涌賽馬會游泳池。青衣泳池係區裏面至新至多人嘅泳池，好早就埋家庭更衣室設施[2]。
社區地位 編輯
雖然1970年代尾開始，青衣島人口就起勢咁飊，1980年代都規劃好晒，但係一直都無公眾地方畀島民游水。所以，未起青衣泳池之前，呢處嘅人都會去葵盛游泳池同之後嘅荔枝角游泳池。要到1996年青衣先至有自己嘅公眾泳池，個泳池好受島民歡迎。
因為咁受歡迎，葵青區議會議員就提過不如將青衣泳池改成暖水泳池，等島民冬天都有得用。不過，康文署話暖水池要起鍋爐，改裝費好貴，不如叫人去隔籬區嘅荔枝角泳池，深水埗公園游泳池同埋城門谷游泳池[3]。
咁啱泳池起好嗰時，青衣西面東涌新市鎮又開始起勢咁起。雖然東涌同青衣都幾遠下，但係青衣泳池已經係東涌人最方便去嘅泳池，所以個泳池都要兼顧埋東涌人口。2006年計東涌有成8萬人住，不過政府就根據《香港規劃標準與準則》，話東涌人口比例唔夠數，一直都唔肯起泳池。到《2006至2007年施政報告》，政府先決定起東涌游泳池，2011年完工[4]。起好之前，康文署響2006年夏天搞過「跳出東涌齊暢泳」游泳同樂日，安排埋旅遊巴，送東涌居民來回青衣泳池，以解東涌居民無水游之苦[5]。
設施 編輯
- 主池
- 習泳池
- 戲水池
- 嬉水池
- 974個座位觀眾看台
- 電子計分板
- 家庭更衣室
青衣泳池同好多香港公眾泳池一樣，係預咗位有間餐廳，家下青衣泳池餐廳係新生餐廳，係新生精神康復會打理。泳池餐廳開初曾經公開招標，搵人頂來做，後尾區域市政總署檢討過﹐自動飲品售賣機或者小食亭都夠晒﹐加上附近有好多食肆﹐所以就索性將地方改做多用途活動室，搞訓練班講座、或者畀學校搞水運會嗰陣做指揮中心[6]。最尾，呢處又改餐做餐廳，畀新生精神康復會，精神病康復者學員做餐飲，等佢吔可以重投社會[7]。
開放時間 編輯
- 第一節：上晝6:30至中午12:00
- 第二節：下晝1:00時至6:30
- 第三節：晚上7:30至10:00
（暫停開放時段：中午12:00至下晝1:00；下晝6:30至7:30）
附近公共設施 編輯
青衣泳池交涌好方便，因為隔籬就係地鐵到機鐵青衣站，兼巴士總站同小巴站，穿過青衣城就到。青衣泳池同其他康樂設施係連成一氣。除咗隔籬青衣海濱公園同青衣運動場兼球場，過馬路重有青衣公園同青衣綜合大樓裏面嘅青衣體育館。
大清潔日 編輯
逢禮拜四（如果大清潔日係公眾假期，游泳池會照常開放，而大清潔日會改喺嗰個禮拜嘅禮拜二進行）
參考 編輯
- ↑ 葵青區議會 (2005年). 《[http://www.dckwaitsing.org.hk/Chinese/DownloadCenter/KwaiTsingDocumentary.asp 葵青—舊貌新顏·傳承與突破]增訂版》. 香港: 葵青區議會. pp. 74頁.
{{cite book}}: External link in|title= - ↑ 〈葵青區議會康樂及文化委員會第三次會議記錄（二零零五／零六）〉. 原著喺2007年9月27號歸檔. 喺2007年7月7號搵到.
- ↑ 〈葵青區議會康樂及文化委員會第一次會議記錄（二零零六／零七）〉. 原著喺2007年9月29號歸檔. 喺2007年7月7號搵到.
- ↑ 東涌泳池2011年竣工 互聯網檔案館嘅歸檔，歸檔日期2007年9月30號，.，香港政府新聞網，2006年7月5號
- ↑ 康文署辦東涌游泳同樂日 互聯網檔案館嘅歸檔，歸檔日期2007年9月30號，.，香港政府新聞網，2006年7月21號
- ↑ 區署僅按環境需求轉變 更改屬下泳池餐廳用途，《成報》，1999年6月20號
- ↑ 衛生福利及食物局局長巡視葵青區，政府新聞署，2006年8月4號