五十蚊紙(50元紙幣)係現時香港流通貨幣之一,面值50港元,目前分別由香港3間發鈔銀行發行。作用主要係輔助廿蚊紙[未記出處或冇根據],所以出得比較少。實際上,以鈔票冧巴計,50蚊紙係出得最少嘅銀紙之一。

編輯

50蚊紙早喺19世紀中已經由當時嘅3間發鈔銀行──香港上海匯理銀行(即後來嘅香港上海滙豐銀行)、印度新金山中國匯理銀行(即後來嘅渣打銀行)、印度倫頓中國三處匯理銀行(即後來嘅有利銀行)出,至到1941年香港淪陷為止。

直到1968年,滙豐銀行至再出新版50蚊紙,設計以藍色為主調,而渣打銀行亦自1970年起出藍色嘅50蚊紙。自1985年起,兩間發鈔銀行嘅50蚊紙除咗細張啲之外,亦改以紫色印刷。喺1993年,因應香港主權移交臨近,兩間發鈔銀行改咗原本帶有英國色彩嘅鈔票設計,但色水冇變。到咗1994年中國銀行香港分行(即後來嘅中銀香港)亦加入發行紫色嘅50蚊紙。

然而,香港金融管理局2002年推出紫色嘅10蚊紙,3間發鈔銀行為免市民混淆,喺2003年重新設計嘅50蚊紙改以綠色為主色,當中渣打銀行嘅新版50蚊紙,唔再採用沿用咗23年嘅「獅子踩波」圖案,改用舊版廿蚊紙嘅「海龜」圖案。由於回收步伐幾快,舊版紫色50蚊紙已經較少流通。