香港仔郊野公園
香港仔郊野公園（英文：Aberdeen Country Park）係響香港香港仔嘅郊野公園，響1977年10月28號劃定，廣受本地人士歡迎，亦都吸引一啲外地遊客到訪。響香港郊野公園成立之前，呢處係郊野公園試點，當時叫做香港仔森林公園[1]。
位置 編輯
香港仔郊野公園響香港島嘅山嘅南面，向北伸到去灣仔峽，南面就係香港仔同黃竹坑，面積大約423公頃。佢環繞住香港仔水塘，分為香港仔上水塘同香港仔下水塘。
自然環境 編輯
香港仔郊野公園有好多樹，主要係二戰後種嘅好多種闊葉類樹木，比較常見嘅有紅膠木、木荷、大頭茶、鴨腳木同崗捻。而常見嘅雀仔有麻鷹、毛雞、畫眉、喜鵲、了哥、釣魚郎等，間中亦都會見到穿山甲同松鼠行過。
好去處 編輯
香港仔自然教育徑響香港仔下水塘東面，遊客可以睇住教育徑上嘅傳意牌加深對郊野嘅認識。
港島徑香港仔同黃竹坑段亦都響公園裏面，西面由貝璐道開始，東面去到布力徑，全長大約14公里。
郊野公園亦都提供唔同嘅康樂設施，包括燒烤爐、太極台、兒童遊樂設施、樹木研習徑同健身徑等，另外重有一條輪椅徑畀傷健人士用。而香港仔郊野公園遊客中心有查詢服務，同埋展出郊野公園資料。
交通 編輯
由於香港仔郊野公園接近市區，交通算係方便，可以由香港仔經香港仔水塘道去到，由黃泥涌峽同灣仔峽就可以經布力徑，由山頂區同香港仔就可以經貝璐道。