香港公園

香港公園（英文：Hong Kong Park）係香港一公園，喺香港島中環尾金鐘山邊，紅棉路十九號，地方好大。公園用咗三億九千萬蚊起，佔地八公頃，行政上歸中西區。

歷史

香港公園喺前域多利兵房上半部。1979年，香港政府決定將域多利兵房嘅下半部，留畀商業用，其他部份就用嚟做公園。當年英皇御准香港賽馬會有份捐錢起一部分。公園最後喺1991年5月由港督衛奕信爵士主持揭幕儀式。

公園地勢相當斜，而起嗰陣，原有嘅樹大部分都保留。

有5個入口，連接法院道，紅棉路山頂纜車總站，堅尼地道。法院道有扶手電梯連接太古廣場同港鐵金鐘站。

公園文化設施有視覺藝術中心同茶具文物館，重有好多康體設施，好似香港壁球中心、室內運動場同太極園。公園裏面有好多動植物畀人睇，有尤德觀鳥園、溫室等。其他地方重有花園廣場、奧林匹克廣場、兒童遊樂場同食堂。

公園近紅綿路重有紅棉路婚姻登記處，係結婚熱門地點。

香港公園入面有條14年歷史嘅長滑梯，係唔少80後至00後嘅童年回憶。康文署喺2015年1月以「冇零件而難復修」為理由拆咗條長滑梯^[1]。事件引發市民喺facebook度開咗個叫「還我香港公園長滑梯」嘅群組嚟發起聯署，要求康文署原址重建長滑梯。經過一年嘅爭取，長滑梯喺2016年7月27號重新開放。